Shraddha Walkar: ఆత్మగా తిరిగి వచ్చి అతడిని 70 ముక్కలు చేయాలి..

దిల్లీ: పెళ్లి చేసుకోమని ఒత్తిడి చేసినందుకు ఓ వ్యక్తి తన ప్రియురాలిని హత్యచేసి, 35 ముక్కలు చేసిన ఘటన దేశవ్యాప్తంగా సంచలనం సృష్టిస్తోంది. నిందితుడిని విచారిస్తోన్న పోలీసులు ఎన్నో విస్తుపోయే విషయాలను గుర్తిస్తున్నారు. దీనిపై ప్రముఖ దర్శకుడు రామ్‌ గోపాల్ వర్మ తనదైన శైలిలో స్పందించారు. దేవుడికి వింత అభ్యర్థన చేశారు. 

‘మరణించి ఎక్కడో విశ్రాంతి తీసుకునే బదులు.. ఆత్మగా తిరిగి వచ్చి అతడిని 70 ముక్కలు చేయాలి. కేవలం చట్టం భయంతో ఇలాంటి హత్యలను నిరోధించలేం. మృతిచెందినవారి  ఆత్మలు తిరిగివచ్చి హంతకులను చంపితే.. వాటిని కచ్చితంగా ఆపవచ్చు. భగవంతుడు దీనిని పరిగణనలోకి తీసుకోవాలని కోరుతున్నాను’ అని తీవ్ర ఆగ్రహం వ్యక్తం చేశారు. 

మహారాష్ట్రకు చెందిన అఫ్తాబ్‌, శ్రద్ధాలు మూడేళ్లు సహజీవనం చేశారు. పెళ్లి చేసుకోవాలని శ్రద్ధా పదేపదే ఒత్తిడి చేస్తుండటంతో అఫ్తాబ్‌ ఆమెను మే 18న గొంతుకోసి చంపాడు. ఆపై శవాన్ని 35 ముక్కలు చేసి వాటిని ఫ్రిజ్‌లో దాచాడు. 18 రోజులపాటు వాటిని రాత్రివేళల్లో నిర్మానుష్య ప్రాంతాలకు తీసుకెళ్లి విసిరేశాడు. శ్రద్ధా శరీర భాగాలు ఫ్రిజ్‌లో ఉండగానే.. అఫ్తాబ్‌ ఆన్‌లైన్‌ డేటింగ్‌ యాప్‌లో మరో యువతికి వలవేసి, ఆమెను పలుమార్లు తన అపార్ట్‌మెంట్‌కు రప్పించుకున్నాడని వెల్లడైంది.