చంద్రయాన్‌ 3 పరీక్షలు పూర్తి.. లాంచ్‌ అయ్యేది ఆ నెలలోనే

దిల్లీ: ఈ ఏడాది ఆగస్టులో చంద్రయాన్‌-3 ప్రయోగం చేపట్టనున్నట్లు భారత అంతరిక్ష విభాగం వెల్లడించింది. చంద్రయాన్-2 మిషన్ నుంచి నేర్చుకున్న పాఠాలు, అంతర్జాతీయ నిపుణుల సూచనల ఆధారంగా.. చంద్రయాన్-3 మిషన్‌కు సంబంధించిన పనులు జరుగుతున్నాయని లోక్‌సభకు రాతపూర్వక సమాధానంలో తెలిపింది. ఇప్పటికే అవసరమైన పరీక్షలు పూర్తయ్యాయని, ఆగస్టులో లాంచ్ చేయనున్నట్లు చెప్పింది. 2019 జులైలో చేపట్టిన చంద్రయాన్‌- 2 ప్రయోగంలో భాగంగా ఇందులోని ల్యాండర్‌, రోవర్‌.. చంద్రుడి ఉపరితలంపై క్రాష్‌ ల్యాండ్‌ అయిన విషయం తెలిసిందే. ఇది జరిగిన దాదాపు మూడేళ్ల తరువాత.. ఇస్రో ‘చంద్రయాన్-3’కి సిద్ధమైంది. చంద్రుడిపై పరిశోధనల కోసం భారత్‌ ప్రకటించిన చంద్రయాన్ కార్యక్రమంలో ఇది మూడో యాత్ర కానుంది. దీంతోపాటు అంతరిక్ష విభాగం తన 2022 టైమ్‌లైన్‌నూ విడుదల చేసింది.

వాస్తవానికి చంద్రయాన్‌-3ని 2021లోనే ప్రయోగించాల్సి ఉంది. అయితే, ఈ మిషన్ వెనుక నిరంతర జాప్యంపై ప్రశ్నలకు శాస్త్ర, సాంకేతిక శాఖ మంత్రి డా.జితేంద్ర సింగ్ సమాధానమిస్తూ.. కొవిడ్ పరిస్థితుల కారణంగా ఇదివరకే షెడ్యూల్‌ చేసిన అనేక అంతరిక్ష కార్యక్రమాలు ప్రభావితమైనట్లు తెలిపారు. అంతరిక్ష రంగంలో సంస్కరణలు, డిమాండ్‌ ఆధారిత ప్రాధాన్యాల ప్రాతిపదికన ఈ ఏడాదిలో 19 ప్రయోగాలు చేపట్టేందుకు అంతరిక్ష విభాగం ప్రణాళికలు రూపొందించినట్లు చెప్పారు. ఇందులో ఎనిమిది రాకెట్‌, ఏడు స్పేస్‌క్రాఫ్ట్, నాలుగు సాంకేతిక ప్రదర్శన సంబంధిత మిషన్‌లు ఉన్నాయని కేంద్ర మంత్రి తన రాతపూర్వక సమాధానంలో వెల్లడించారు. మరోవైపు, ఈ ఏడాది తొలి అంతరిక్ష ప్రయోగం ఫిబ్రవరి మధ్యలో చేపట్టే అవకాశాలు ఉన్నాయి. పీఎస్‌ఎల్‌వీ సాయంతో రాడార్ ఇమేజింగ్, నిఘా కోసం ఉపయోగించే ‘రిశాట్‌-1ఏ’ ఎర్త్ అబ్జర్వేషన్ శాటిలైట్‌ను ప్రయోగించేందుకు ఇస్రో శాస్త్రవేత్తలు సిద్ధమవుతున్నారు. దీనికి సంబంధించిన తేదీని వెల్లడించాల్సి ఉంది.