Jabalpur: రన్‌వే నుంచి పక్కకు వెళ్లిన విమానం.. ఇద్దరు పైలట్ల లైసెన్సులు రద్దు

దిల్లీ: మధ్యప్రదేశ్‌లోని జబల్‌పూర్‌ విమానాశ్రయంలో మార్చి 12న జరిగిన ప్రమాదంపై పౌర విమానయానశాఖ డైరెక్టరేట్‌ జనరల్‌ (డీజీసీఏ) చర్యలు చేపట్టింది. ఆ విమానం నడిపిన ఇద్దరు పైలట్లపై వేటువేస్తూ ఏడాదిపాటు వారి లైసెన్సులను రద్దుచేసింది. 55 మంది ప్రయాణికులతో దిల్లీ నుంచి బయల్దేరిన అలయన్స్ ఎయిర్ ఏటీఆర్-72 విమానం జబల్‌పూర్‌ విమానాశ్రయంలో ల్యాండ్‌ అవుతూ రన్‌వే నుంచి పక్కకు వెళ్లిపోయింది. అదృష్టవశాత్తూ ఎవరికి ఎలాంటి ప్రమాదం జరగలేదు. జబల్‌పూర్ విమానాశ్రయంలో ల్యాండింగ్ సమయంలో విమానం చాలాసేపు ఎగురుతూ ఎయిమింగ్ పాయింట్(టచ్‌డౌన్ పాయింట్)కు 900 మీటర్లు దూరంగా వెళ్లినట్లు విచారణలో తేలింది. ‘డీజీసీఏ విచారణ అనంతరం ఇద్దరు ఆపరేటింగ్‌ సిబ్బంది లైసెన్స్‌ను ఏడాది పాటు రద్దు చేసింది’ అని విమానయానశాఖ ఓ ప్రకటనలో తెలిపింది.