Instagram: ఇన్‌స్టాలో బగ్‌ పట్టి.. రూ.38 లక్షలు రివార్డు కొట్టేశాడు!

ఇంటర్నెట్‌ డెస్క్‌: ప్రముఖ సోషల్‌ మీడియా ప్లాట్‌ఫాం ‘ఇన్‌స్టాగ్రామ్‌(Instagram)’లో ఓ బగ్‌(Bug)ను కనిపెట్టిన యువకుడు.. ఆ సంస్థ నుంచి ఏకంగా రూ.38.5 లక్షల పారితోషికం పొందాడు. ఇతర యూజర్‌ల లాగిన్‌ ఐడీ, పాస్‌వర్డ్‌ అవసరం లేకుండానే ఏ ఇన్‌స్టా ఖాతా నుంచైనా.. వారి ఇన్‌స్టాగ్రామ్‌ రీల్స్‌(Reels)కు చెందిన థంబ్‌నెయిల్‌(Thumbnail)ను మార్చేందుకు వీలు కల్పించే బగ్‌ను అతను కనుగొన్నాడు. దీంతో.. ఈ లోపాన్ని ఆసరాగా చేసుకుని హ్యాకర్లు.. వినియోగదారుల రీల్స్‌ థంబ్‌నెయిల్స్‌ విషయంలో వారి ప్రమేయం లేకుండానే మార్పులు చేసే అవకాశాన్ని అడ్డుకున్నట్లయింది.

రాజస్థాన్‌లోని జైపుర్‌కు చెందిన నీరజ్‌ శర్మ ఈ ఏడాది జనవరిలోనే తన అకౌంట్‌లో ఈ బగ్‌ను గుర్తించాడు. దీనిపై ‘ఫేస్‌బుక్‌’కు రిపోర్టు చేశాడు. దీంతో కంపెనీ ప్రతినిధులు.. ఈ లోపానికి సంబంధించిన డెమో ఇవ్వాలని అడిగారు. ఈ క్రమంలోనే లాగిన్‌ వివరాలు అవసరం లేకుండానే ఇతరుల ఇన్‌స్టాగ్రామ్‌ రీల్‌ థంబ్‌నెయిల్‌ను మార్చి చూపుతూ.. ఓ 5 నిమిషాల డెమోను శర్మ సంస్థకు పంపాడు. అనంతరం దీనిపై క్షుణ్ణంగా విచారణ జరిపిన సంస్థ.. మే నెలలో ఈ లోపాన్ని అంగీకరించింది. ఈ క్రమంలోనే శర్మకు 45 వేల డాలర్ల(రూ.35 లక్షలు) రివార్డు అందజేసింది. దీంతోపాటు రివార్డు అందజేయడంలో నాలుగు నెలల ఆలస్యానికిగానూ మరో 4500 డాలర్లు(రూ.3.5 లక్షలు) అదనంగా ప్రకటించింది.

‘ఇన్‌స్టాగ్రామ్‌లోని ఓ బగ్‌ ద్వారా.. ఎవరి రీల్ థంబ్‌నెయిల్‌ అయినా సరే.. వేరే ఇతర అకౌంట్ల నుంచీ మార్చొచ్చు. సంబంధిత యూజర్‌ పాస్‌వర్డ్ ఎంత బలంగా ఉన్నా సరే.. కేవలం వారి అకౌంట్‌కు సంబంధించిన మీడియా ఐడీ సాయంతో ఈ పని చేయొచ్చు. గతేడాది డిసెంబర్‌లో నా ఇన్‌స్టాగ్రామ్ అకౌంట్‌లో ఈ లోపాన్ని వెతకడం మొదలుపెట్టా. జనవరి 31న బగ్ గుర్తించా. దీనిపై ఫేస్‌బుక్‌కు రిపోర్ట్ పంపా. మూడు రోజుల తర్వాత వారి నుంచి సమాధానం వచ్చింది. వారు కోరినట్లుగానే డెమో పంపా’ అని శర్మ ఓ వార్తాసంస్థకు తెలిపారు.

ఇదిలా ఉండగా.. ఫేస్‌బుక్‌, ఇన్‌స్టాగ్రామ్‌ల భద్రతను ఎప్పటికప్పుడు మెరుగుపరిచేందుకుగాను ‘మెటా’ సంస్థ ప్రోగ్రామర్ల కోసం ప్రత్యక్షంగా ‘మెటా బగ్ బౌంటీ ప్రోగ్రామ్‌’ను నిర్వహిస్తుంది. మెటా సాంకేతికతలు, ప్రోగ్రామ్‌లలో భద్రతాపరమైన లోపాలను గుర్తించిన ప్రోగ్రామర్లు, పరిశోధకులకూ భారీగా రివార్డులు అందజేస్తుంటుంది.