Earthquake: అఫ్గాన్‌లో భూకంపం.. కశ్మీర్‌, దిల్లీల్లో కంపించిన భూమి

దిల్లీ: అఫ్గానిస్థాన్‌లో శనివారం ఉదయం భూకంపం సంభవించింది. దీని ప్రభావం కారణంగా ఉత్తర భారతదేశంలో పలు ప్రాంతాల్లో భూమి కంపించింది. జమ్మూకశ్మీర్‌తో పాటు నోయిడా, దిల్లీల్లో భూప్రకంనలు చోటుచేసుకున్నట్లు తెలుస్తోంది. 

శనివారం ఉదయం 9.45 గంటల ప్రాంతంలో అఫ్గాన్‌ - తజకిస్థాన్‌ సరిహద్దులో భూకంపం సంభవించింది. రిక్టర్‌ స్కేలుపై భూకంప తీవ్రత 5.7గా నమోదైనట్లు నేషనల్‌ సెంటర్‌ ఫర్‌ సెస్మాలజీ వెల్లడించింది. అఫ్గానిస్థాన్‌లోని ఫైజాబాద్‌కు ఆగ్నేయ దిశలో 118 కిలోమీటర్ల దూరంలో భూకంప కేంద్రం ఉన్నట్లు అధికారులు తెలిపారు. అయితే భూకంపం కారణంగా ఇప్పటివరకు ఆస్తి, ప్రాణ నష్టం సంభవించినట్లు సమాచారం లేదు.

దీని ప్రభావం కారణంగా జమ్మూకశ్మీర్‌లో భూ ప్రకంపనలు చోటుచేసుకున్నాయి. ఈ ఉదయం దాదాపు 30 సెకన్ల పాటు భూమి కంపించడంతో స్థానికులు ఇళ్ల నుంచి బయటకు పరుగులు తీశారు. నోయిడా, దిల్లీ పరిసర ప్రాంతాల్లోనూ భూమి కంపించినట్లు కొందరు స్థానికులు ట్విటర్‌ వేదికగా వెల్లడించారు.