Kaali Poster: ‘కాళీ’ వివాదం.. మరో అభ్యంతరకర పోస్ట్‌ చేసిన మణిమేగలై

ఇంటర్నెట్‌ డెస్క్‌: దర్శకురాలు లీనా మణిమేగలై విడుదల చేసిన ‘కాళీ’ పోస్టర్‌పై ఓ వైపు దేశవ్యాప్తంగా దుమారం రేగుతుండగానే.. ఆ దర్శకురాలు తాజాగా మరో అభ్యంతరకర పోస్ట్‌ పెట్టారు. దేవుళ్ల వస్త్రధారణలో ఉన్న వ్యక్తులు సిగరెట్‌ తాగుతున్న ఫొటోను ట్విటర్‌లో పోస్ట్ చేసిన లీనా.. ‘ఎక్కడో మరోచోట’ అనే పదాన్ని రాశారు. తాజా వివాదానికి కారణమైన ‘కాళీ’ పోస్టర్‌ కోవలోనే ఈ ఫొటో ఉండటం గమనార్హం. కాళీ వివాదం విషయంలో తనపై పలు కేసులు నమోదైన నేపథ్యంలో.. తాజా పోస్ట్‌తో లీనా తన వాదనను సమర్థించుకునేయత్నం చేసింది.

తమిళనాడు మధురైకి చెందిన లీనా మణిమేగలై.. ‘రిథమ్స్‌ ఆఫ్‌ కెనడా’లో భాగంగా ‘కాళీ’ పేరుతో ఓ డాక్యుమెంటరీ చిత్రీకరించారు. దీనికి సంబంధించిన పోస్టర్‌ను కెనడాలోని టొరంటోలోని ఉన్న అగాఖాన్‌ మ్యూజియంలో విడుదల చేశారు. అయితే, ఆ పోస్టర్‌ దేవతా మూర్తిని కించపరిచేలా ఉందని ఆరోపిస్తూ భారత్‌లో నిరసనలు వెల్లువెత్తిన విషయం తెలిసిందే. అందులోకి కాళీ చేతిలో సిగరెట్‌ కన్పించడం, వెనుకవైపు స్వలింగ సంపర్కుల జెండా వంటివి తీవ్ర వివాదానికి దారితీశాయి.

ఈ క్రమంలోనే ఆమె చేసిన పోస్ట్‌ మత విశ్వాసాలను దెబ్బతీసేలా ఉందంటూ పలు రాష్ట్రాల్లో కేసులు నమోదయ్యాయి. అటు కెనడాలోని భారత హైకమిషన్‌ కూడా దీన్ని తీవ్రంగా పరిగణించింది. దీంతో స్పందించిన అగాఖాన్‌ మ్యూజియం.. ఆ డాక్యుమెంటరీని ప్రదర్శన నుంచి తొలగించింది. అటు ట్విటర్‌ కూడా లీనా పోస్టర్‌ను తొలగించింది. ఇదిలా ఉండగా.. ఈ పోస్టర్‌పై స్పందిస్తూ టీఎంసీ ఎంపీ మహువా మొయిత్రా అభ్యంతరకర వ్యాఖ్యలు చేయడం కూడా తీవ్ర దుమారం రేపింది. దీంతో ఆమెపైనా కేసులు నమోదయ్యాయి. అయితే తాను ఏ చిత్రానికీ, ఏ పోస్టర్‌కూ మద్దతు ఇవ్వలేదని, ధూమపానం అనే పదాన్ని అసలు వాడనేలేదని వివరణ ఇచ్చారు.