Kapil sibal: కపిల్‌ సిబల్‌ కొత్త వేదిక.. కలిసి రావాలని సీఎంలకు పిలుపు

దిల్లీ: ప్రముఖ న్యాయవాది, రాజ్యసభ సభ్యుడు కపిల్‌ సిబల్‌ (Kapil sibal) కొత్త వేదికను నెలకొల్పారు. గతంలో కేంద్ర మంత్రిగా పనిచేసిన ఆయన.. భాజపా ప్రభుత్వంలో జరుగుతున్న అన్యాయాన్ని ఎదుర్కొనేందుకు ‘ఇన్సాఫ్‌’ (Insaaf) పేరిట వేదికను స్థాపిస్తున్నట్లు ప్రకటించారు. ప్రజల కోసం ‘ఇన్సాప్ కే సిపాహి’ పేరిట వెబ్‌సైట్‌ను సైతం అందుబాటులోకి తెస్తున్నట్లు తెలిపారు. ఈ వేదిక ద్వారా ప్రజల తరఫున లాయర్లు పోరాటం చేస్తారన్నారు. విపక్ష పార్టీల ముఖ్యమంత్రులు, నేతలు తన ప్రయత్నానికి మద్దతుగా నిలవాలని కోరారు. ఈ మేరకు దిల్లీలో విలేకరులతో మాట్లాడారు.

మార్చి 11న దిల్లీలోని జంతర్‌మంతర్‌ వద్ద ఓ సమావేశం ఏర్పాటు చేసి తన ఈ వేదిక లక్ష్యాలను వివరిస్తానని కపిల్‌ సిబల్‌ తెలిపారు. జాతీయ స్థాయిలో ఏర్పాటు చేస్తున్న ఈ వేదికకు అండగా నిలవాలన్నారు. ఇది ప్రజల వేదిక అని, తాను ఎలాంటి రాజకీయ పార్టీ స్థాపించడం లేదని స్పష్టంచేశారు. దేశంలోని ప్రతి ప్రాంతంలో ఆరెస్సెస్‌ శాఖలు తమ సిద్ధాంతాలను విస్తృతంగా ప్రచారం చేస్తున్నాయని, దీనివల్ల అన్యాయాలు జరుగుతున్నాయన్నారు. దీనిపై కూడా పోరాడాల్సిన అవసరం ఉందన్నారు. మరోవైపు గతేడాది కాంగ్రెస్‌ నుంచి బయటకు వచ్చిన కపిల్‌ సిబల్‌ సమాజ్‌వాదీ పార్టీ మద్దతుతో స్వతంత్ర అభ్యర్థిగా రాజ్యసభలో అడుగుపెట్టారు.