Terror Attack: ఒకేరోజు మూడు చోట్ల ఉగ్ర ఘాతుకం.. జవాన్‌, కశ్మీరీ పండిట్‌ హత్య

శ్రీనగర్‌: జమ్మూకశ్మీర్​లో ఉగ్రవాదులు రెచ్చిపోయారు. ఒకేరోజు మూడు చోట్ల దాడులకు పాల్పడ్డారు. షోపియన్‌ జిల్లా చోటోగామ్‌ ప్రాంతంలో కశ్మీరీ పండిట్‌ అయిన ఓ దుకాణాదారుడిని కాల్చి చంపారు. ఉగ్రదాడుల సమాచారం అందుకున్న జవాన్లు ఘటనా ప్రాంతానికి చేరుకున్నారు. తీవ్రంగా గాయపడిన బాధితుడిని వెంటనే ఆసుపత్రికి తరలించగా.. మార్గం మధ్యలోనే అతడు ప్రాణాలు కోల్పోయాడు. మరణించిన వ్యక్తిని సోనూ కుమార్‌ బాల్జీగా గుర్తించినట్టు పోలీసులు తెలిపారు. 

జవాన్లపై దాడులు

శ్రీనగర్​లోని మైసుమా ప్రాంతంలో ఇద్దరు సీఆర్ఫీఎఫ్ జవాన్లపై ఉగ్రవాదులు కాల్పులకు తెగబడ్డారు. ఈ ఘటనలో ఇద్దరు జవాన్లు తీవ్రంగా గాయపడ్డారు. వీరిలో ఒకరు ఆస్పత్రిలో చికిత్స పొందుతూ మరణించినట్లు అధికారులు తెలిపారు. మైసుమా ప్రాంతాన్ని అధీనంలోకి తీసుకున్నట్లు చెప్పారు. పోలీసులు నిందితుల కోసం గాలింపు చర్యలు చేపట్టినట్లు వెల్లడించారు. మరోవైపు, వలసదారులపైనా ముష్కరులు కాల్పులు జరిపారు. పుల్వామా జిల్లాలో వలస కూలీలపై సోమవారం జరిపిన కాల్పుల్లో ఇద్దరు గాయపడ్డారు. 24 గంటల వ్యవధిలో మూడు చోట్ల దాడులు జరగడం తీవ్ర ఆందోళనకు గురిచేస్తోంది.