Kejriwal: మోదీ సర్‌.. దేశంలో పాఠశాలల పురోగతికి కలిసి పనిచేద్దాం..!

దిల్లీ: గుజరాత్‌తోపాటు దేశ రాజధాని దిల్లీలో పలు అంశాలపై ఆమ్‌ఆద్మీ పార్టీ, భాజపా మధ్య మాటల యుద్ధం కొనసాగుతోన్న సంగతి తెలిసిందే. ఇదే సమయంలో దేశంలోని పాఠశాలల పురోగతికి కలిసి పనిచేద్దామని దిల్లీ ముఖ్యమంత్రి కేజ్రీవాల్‌ ప్రధానమంత్రికి విజ్ఞప్తి చేశారు. గుజరాత్‌ పర్యటనలో భాగంగా గాంధీనగర్‌లో పాఠశాల విద్యార్థులతో ముచ్చటించడంపై స్పందించిన కేజ్రీవాల్‌.. పాఠశాలలను మెరుగుపరచడంలో తమ ప్రభుత్వం ఎంతో ప్రావీణ్యం సంపాదించిందని, వాటిని ఉపయోగించుకోవాలని సూచించారు.

‘పీఎం సర్‌, దిల్లీలో విద్యా రంగంలో అద్భుతమైన పనితీరు కనబరిచాం. గడిచిన ఐదు సంవత్సరాల్లో దిల్లీ ప్రభుత్వ పాఠశాలలు అసాధారణ స్థాయిలో మెరుగుపడ్డాయి. ఇలాగే కేవలం ఐదేళ్లలో దేశంలోని పాఠశాలలన్నింటినీ అభివృద్ధి చేయవచ్చు. ఈ రంగంలో మాకు అనుభవం ఉంది. దీనిని పూర్తిగా ఉపయోగించుకోండి. ఈ విషయంలో దేశం కోసం కలిసి పనిచేద్దాం’ అని అరవింద్‌ కేజ్రీవాల్‌ పేర్కొన్నారు. పాఠశాల విద్యార్థులతో కలిసి ప్రధాని మోదీ కూర్చున్న ఫొటోను షేర్‌ చేసిన ఆయన.. దేశంలోని అన్ని రాజకీయ పార్టీలు విద్య గురించి మాట్లాడటం సంతోషకర విషయమన్నారు. ఇది తమ పార్టీ సాధించిన అతిపెద్ద విజయమన్న కేజ్రీవాల్‌.. ప్రభుత్వాలన్నీ కలిసి తమ పాఠశాలలను కేవలం ఐదేళ్లలోనే గొప్పగా తీర్చిదిద్దుకోవచ్చని ఆశాభావం వ్యక్తం చేశారు.