కుంభమేళాకు 91 లక్షల మంది హాజరు!

హరిద్వార్‌: హరిద్వార్‌లో జరిగిన కుంభమేళాకు 91 లక్షల మంది భక్తులు హాజరైనట్లు కార్యక్రమ నిర్వహకులు వెల్లడించారు. జనవరి 14 నుంచి ఏప్రిల్‌ 27 మధ్య వీరంతా పవిత్ర స్నానమాచరించినట్లు తెలిపారు. అత్యధికంగా ఏప్రిల్‌లో 60 లక్షల మంది హరిద్వార్‌లోని ఘాట్లకు చేరుకున్నారని కుంభమేళా ఫోర్స్‌ వెల్లడించింది. 

ఇక ఏప్రిల్‌ 12న ఒకేరోజు 35 లక్షల మంది కుంభమేళాకు హాజరైనట్లు పేర్కొన్నారు. ఇక మార్చి 11న జరిగిన మహాశివరాత్రి రోజు 32 లక్షల మంది భక్తులు పుణ్యస్నానమాచరించినట్లు తెలిపారు. చివరగా 25 వేల మంది భక్తులు తుది రాజ స్నానం(షాహీ స్నాన్‌) ఆచరించారు. కుంభమేళా ముగిసిన తర్వాత బుధవారం నుంచి హరిద్వార్‌లో కర్ఫ్యూ విధించారు. 

దేశంలో కరోనా రెండో దశ ఉద్ధృతంగా ఉన్న సమయంలో హరిద్వార్‌లో కుంభమేళా నిర్వహించడంపై సర్వత్రా విమర్శలు వ్యక్తమయ్యాయి. ఈ నేపథ్యంలో ప్రధానమంత్రి నరేంద్రమోదీ దీనిపై స్పందించారు. ప్రస్తుత మహమ్మారి కఠిన పరిస్థితుల్లో కుంభమేళాను ప్రతీకాత్మకంగానే (భక్తులెవరూ లేకుండా కేవలం లాంఛనప్రాయంగా కొనసాగించడం) జరపాలంటూ సాధువులను కోరిన విషయం తెలిసిందే. దీనికి వారు సానుకూలంగా స్పందించడంతో కుంభమేళా ముందుగానే ముగిసింది.