Lakhmipur Kheri violence: ఇది తీవ్రమైన నేరం.. కానీ నిందితుడు పారిపోయే ప్రమాదం లేదు..!

దిల్లీ: లఖింపుర్ ఖేరి ఘటన తీవ్రమైందే అయినా.. ప్రధాన నిందితుడు ఆశిష్‌ మిశ్రా దేశం విడిచిపారిపోయే ప్రమాదం లేదని సోమవారం యూపీ ప్రభుత్వం సుప్రీంకోర్టుకు వెల్లడించింది. అలాగే సాక్ష్యాలు తారుమారు కాకుండా సాక్షులకు భద్రత కల్పించామని  చెప్పింది. ఈ ఫిబ్రవరిలో ఆశిష్‌కు బెయిల్‌ మంజూరైంది. దానిని సవాలు చేస్తూ దాఖలైన పిటిషన్‌పై నేడు విచారణ జరిగింది. ఈ కేసు దర్యాప్తు కోసం ఏర్పాటైన సిట్ కూడా బెయిల్‌ రద్దు చేయాలంటూ నివేదిక సమర్పించింది. కాగా, దీనిపై సుప్రీం రాష్ట్ర ప్రభుత్వ స్పందన కోరింది.

‘ఈ నేరం చాలా దారుణమైంది. అయితే అది ఉద్దేశపూర్వకంగా జరిగిందా లేదా అనేది విచారణలో తేలుతుంది. మా వాదనలు విన్న తర్వాత కూడా అలహాబాద్‌ హైకోర్టు బెయిల్ రద్దు చేసింది.  ఏ కేసులో అయినా పదేపదే నేరాలు చేస్తే.. బెయిల్ మంజూరు చేయకూడదు. కానీ ఇది అలాంటి కేసు కాదు. అలాగే సాక్ష్యాలు తారుమారు కాకుండా.. సాక్షులకు రక్షణ కల్పిస్తున్నాం. ఇక నిందితుడు దేశం విడిచిపారిపోయే ప్రమాదం లేదు’ అంటూ యూపీ ప్రభుత్వం వెల్లడించింది. 

కేంద్రం తీసుకువచ్చిన సాగు చట్టాలకు వ్యతిరేకంగా యూపీలో లఖింపుర్ ఖేరికి చెందిన రైతులు నిరసన తెలుపుతుండగా.. ఆశిష్‌కు చెందిన వాహన శ్రేణి వారిపై దూసుకువెళ్లింది. ఆ ఘటనలో నలుగురు చనిపోగా.. తర్వాత ఘర్షణల్లో మరో నలుగురు మరణించారు. గత అక్టోబర్‌లో ఈ ఘటన జరగ్గా.. కొద్దిరోజుల్లోనే ఆశిష్‌ అరెస్టయ్యారు. అయితే ఫిబ్రవరిలో అతడికి బెయిల్ మంజూరు కావడంతో బాధిత కుటుంబాలు సుప్రీంను ఆశ్రయించాయి.