competitive exms: పరీక్షల్లో చీటింగ్‌ చేస్తే జీవిత ఖైదు: ఉత్తరాఖండ్‌ సీఎం

దెహ్రాదూన్‌: ప్రభుత్వ ఉద్యోగాల భర్తీ కోసం నిర్వహించే పోటీ పరీక్షల్లో మోసాలు, కుంభకోణాలను అడ్డుకోవడానికి ఉత్తరాఖండ్‌ ప్రభుత్వం కఠిన నిర్ణయం తీసుకుంది. పోటీ పరీక్షల్లో చీటింగ్‌ చేస్తే యావజ్జీవ కారాగారం లేదా పదేళ్లు జైలు శిక్ష విధించనున్నట్లు ఉత్తరాఖండ్‌ సీఎం పుష్కర్‌ సింగ్‌ వెల్లడించారు. 

‘‘యువకుల కలల్ని, ఆశయాలను మా ప్రభుత్వం కాలరాయదు. అందుకే, పరీక్షల్లో ఎవరైనా చీటింగ్‌ చేస్తే వారికి జీవిత ఖైదు లేదా పదేళ్ల జైలు శిక్ష విధిస్తాం. దీంతోపాటు వారి ఆస్తుల్ని జప్తు చేస్తాం’’అని స్పష్టం చేశారు. 

గతంలో రాష్ట్రంలో చోటుచేసుకున్న పరీక్ష పత్రాలు లీక్‌ ఘటనలకు సంబంధించి పలువురు విద్యార్థులు, నిరుద్యోగులు ఇటీవల ఆందోళన చేశారు. దీంతో సీఎం ‘ఉత్తరాఖండ్‌ కాంపిటేటివ్‌ ఎగ్జామినేషన్‌’ ఆర్డినెన్స్‌ను జారీ చేశారు. తాజాగా లెఫ్టినెంట్‌ గవర్నర్‌ గుర్మీత్‌ సింగ్‌ సంతకం చేయడంతో ఆ ఆర్డినెన్స్‌ చట్టంగా మారింది.