S Jaishankar: శ్రీ కృష్ణుడు, హనుమాన్‌లు ప్రపంచంలోనే గొప్ప దౌత్యవేత్తలు

పుణె: శ్రీకృష్ణ భగవానుడు (Lord Krishna), హనుమాన్‌ (Hanuman)లు ప్రపంచంలోనే గొప్ప దౌత్యవేత్తలని కేంద్ర విదేశాంగ మంత్రి ఎస్‌.జైశంకర్‌ పేర్కొన్నారు. శ్రీలంకలో సీతను గుర్తించిన హనుమాన్‌.. లంకాదహనం కూడా చేసిన విషయాన్ని గుర్తుచేశారు. ఆయన స్వయంగా రాసిన ‘ది ఇండియా వే’ పుస్తక విడుదల కార్యక్రమంలో పాల్గొని.. మహాభారత, రామాయణ ఇతిహాసాలు గొప్పతనాన్ని ప్రస్తావించారు.

కృష్ణుడు, హనుమాన్‌లు ప్రపంచంలోనే అత్యంత గొప్ప దౌత్యవేత్తలు. ఇది వాస్తవం. దౌత్య కోణంలో వారిని చూస్తే.. వారున్న పరిస్థితులు, వారు చేపట్టిన కార్యక్రమం, పరిస్థితులకు అనుగుణంగా వ్యవహరించిన తీరును చూస్తే మనకు అర్థమవుతుంది. సీతను తీసుకురమ్మని హనుమాన్‌కు అప్పజెప్పిన పనినే కాకుండా లంకా దహనం కూడా చేశారు. అందుకే ఆయన భిన్న విధాల దౌత్యవేత్తగా అభివర్ణించవచ్చు’ అని కేంద్ర మంత్రి జైశంకర్‌ పేర్కొన్నారు. ప్రస్తుతం ప్రపంచీకరణ అని చెప్పుకుంటున్నప్పటికీ ఒకరిపై ఒకరు ఆధారపడే పరిస్థితి నెలకొనడంతోపాటు ఆటంకాలు కూడా ఎదురవుతున్నాయని అన్నారు.

‘ది ఇండియా వే: స్ట్రాటజీస్‌ ఫర్‌ యాన్ అన్‌సర్టెయిన్‌ వరల్డ్‌’ పేరుతో కేంద్ర మంత్రి జైశంకర్‌ రాసిన పుస్తకాన్ని ‘భారత్‌ మార్గ్‌’ పేరుతో మరాఠీలోకి తర్జుమా చేశారు. ఈ పుస్తకం విడుదల కార్యక్రమంలో ఇటీవల పుణెలో జరిగింది. ఈ కార్యక్రమానికి ముఖ్య అతిథిగా విచ్చేసిన కేంద్ర విదేశాంగశాఖ మంత్రి జైశంకర్‌.. పైవిధంగా స్పందించారు.