Kejriwal: లెఫ్టినెంట్‌ గవర్నర్‌ మా ‘హెడ్‌మాస్టర్‌’ కాదు: కేజ్రీవాల్‌

దిల్లీ: దిల్లీ లెఫ్టినెంట్‌ గవర్నర్‌ (LG)కి అక్కడి అధికార ఆమ్‌ఆద్మీ (AAP) ప్రభుత్వానికి మధ్య వివాదం రోజురోజుకు ముదురుతోంది. శిక్షణ కోసం టీచర్లను విదేశాలకు పంపించడానికి లెఫ్టినెంట్‌ గవర్నర్‌కు అభ్యంతరం ఏంటి అని ప్రశ్నిస్తూ దిల్లీ ముఖ్యమంత్రి అరవింద్‌ కేజ్రీవాల్‌తో (Kejriwal) కూడిన ప్రజా ప్రతినిధుల బృందం ఎల్జీ కార్యాలయం ముందు నిరసన తెలిపింది. ఎల్జీ సొంతంగా ఎటువంటి నిర్ణయాలు తీసుకోకూడదని.. కానీ, ఆయన అలాగే చేస్తున్నారని ఆరోపించింది. ఇదే అంశంపై దిల్లీ లెఫ్టినెంట్‌ గవర్నర్‌ వీకే సక్సేనా కార్యాలయాన్ని ముట్టడించేందుకు ఉపముఖ్యమంత్రి మనీశ్‌ సిసోదియా, ఆప్‌కు చెందిన ఎమ్మెల్యేలతో కలిసి అరవింద్‌ కేజ్రీవాల్‌ ప్రయత్నించారు.

‘మా పనిని పరిశీలించేందుకు లెఫ్టినెంట్‌ గవర్నర్‌ మా హెడ్‌మాస్టర్‌ కాదు. మేం పంపించిన ప్రతిపాదనలను ఆమోదించడమో లేదా తిరస్కరించడమో చేయాలి. కానీ, ఎల్జీ మాత్రం సొంత నిర్ణయాలు తీసుకుంటున్నారు. ముఖ్యమంత్రి, ఇతర ఎమ్మెల్యేలు ఆయన కార్యాలయం వరకు ర్యాలీ నిర్వహించడం దురదృష్టకరం. ఆయన తప్పిదాన్ని తెలుసుకుంటారని ఆశిస్తున్నాం. ఇప్పటికైనా ఫిన్లాండ్‌లో శిక్షణ కోసం తమ ఉపాధ్యాయులను పంపించేందుకు అంగీకరిస్తారని భావిస్తున్నాం’ అని అరవింద్‌ కేజ్రీవాల్‌ పేర్కొన్నారు. రాజకీయ కారణాలతోనే దిల్లీ ప్రభుత్వ పనులను అడ్డుకుంటున్నారని ఆరోపించిన ఆయన.. నిర్ణయాలు తీసుకునే అధికారం లేనప్పుడు ఎన్నికైన ప్రభుత్వం ఎలా విధులు నిర్వర్తిస్తుందని ప్రశ్నించారు.

అయితే, ఎల్జీ కార్యాలయాన్ని ముట్టడించేందుకు ప్రయత్నించిన సీఎం కేజ్రీవాల్‌ బృందాన్ని.. కొద్ది దూరంలోనే పోలీసులు అడ్డుకున్నారు. అనంతరం ఎల్జీ కార్యాలయం నుంచి సమాచారం రావడంతో తిరిగి అసెంబ్లీకి వెళ్లిపోయారు. ఈ వ్యవహారంపై త్వరలోనే ముఖ్యమంత్రి కేజ్రీవాల్‌, డిప్యూటీ సీఎంలతో సమావేశమవుతానని ఎల్జీ సక్సేనా హామీ ఇచ్చినట్లు సమాచారం. అయితే, విద్యా ప్రమాణాలను పెంచడంలో భాగంగానే తమ ఉపాధ్యాయులను విదేశాలకు పంపించి శిక్షణ ఇప్పిస్తున్నామని ఆప్‌ పేర్కొంది.