మహిళ మృతి కేసు.. ‘మహా’ మంత్రి రాజీనామా

ముంబయి: మహరాష్ట్ర అటవీ శాఖ మంత్రి, శివసేన ఎమ్మెల్యే సంజయ్‌ రాథోడ్‌ తన మంత్రి పదవికి రాజీనామా చేశారు. సీఎం ఉద్ధవ్‌తో భేటీ అనంతరం రాజీనామా నిర్ణయాన్ని ఆదివారం ప్రకటించారు. ఈ నెల 8న అనుమానాస్పద స్థితిలో మరణించిన టిక్‌టాక్‌ స్టార్‌ పూజా చవాన్‌ (22) కేసులో సంజయ్‌ పేరు వెలుగులోకి వచ్చింది. ఆమెతో మంత్రి ఉన్న ఫొటోలు, ఆడియో, వీడియో క్లిప్పింగులు బయటకు రావడంతో విపక్షాలు ఆయన రాజీనామాకు పట్టుబట్టాయి.

ఈ నేపథ్యంలో సంజయ్‌ రాథోడ్‌ తన భార్యతో కలిసి సీఎం ఉద్ధవ్‌తో ఈ అంశంపై చర్చించారు. అనంతరం మీడియాతో మాట్లాడుతూ.. మహిళ మరణాన్ని రాజకీయం చేస్తున్నారని ఆవేదన వ్యక్తంచేశారు. విచారణ పారదర్శకంగా జరగాలన్న ఉద్దేశంతోనే రాజీనామా నిర్ణయం తీసుకున్నట్లు వెల్లడించారు. 30 ఏళ్లుగా అనేక సామాజిక కార్యక్రమాల ద్వారా పొందిన పేరును నాశనం చేసేందుకే ఈ కుట్ర పన్నారని ఆరోపించారు. రాథోడ్‌ కేవలం మంత్రి పదవికి రాజీనామా చేస్తే సరిపోదని, ఆయనపై ఎఫ్‌ఐఆర్‌ నమోదు చేయాలని ప్రతిపక్ష నేత, మాజీ సీఎం దేవేంద్ర ఫడణవీస్‌ డిమాండ్‌ చేశారు.