Vaccine: కరోనా టీకా వల్లే నా కుమార్తె మృతి.. ₹1000 కోట్లు చెల్లించాలి

ముంబయి: కరోనా టీకా దుష్ప్రభావాల కారణంగానే తన కుమార్తె చనిపోయిందని పేర్కొంటూ మహారాష్ట్ర ఔరంగాబాద్​కు చెందిన ఓ వ్యక్తి బాంబే హైకోర్టును ఆశ్రయించాడు. భారీ పరిహారాన్ని కోరాడు. మహారాష్ట్ర ప్రభుత్వం, సీరం సంస్థలను రూ.1000కోట్లు పరిహారం చెల్లించేలా ఆదేశించాలని ఆ పిటిషన్​లో కోరాడు. వైద్య విద్యార్థిని అయిన తన కూతురు గతేడాది జనవరిలో వ్యాక్సిన్ తీసుకుందని, ఆ తర్వాత సైడ్ ఎఫెక్ట్స్​ కారణంగా ప్రాణాలు కోల్పోయిందని వివరించాడు.

‘నా కుమార్తె స్నేహాల్.. నాసిక్​లో వైద్య విద్యార్థిని. వ్యాక్సినేషన్​ డ్రైవ్​లో భాగంగా.. ఆరోగ్య కార్యకర్తలంతా టీకా తీసుకోవాలని మహారాష్ట్ర ప్రభుత్వం చెప్పడంతో ఆమె గతేడాది కొవిషీల్డ్ టీకా డోసు తీసుకుంది. కరోనా టీకా సురక్షితమని, ఎలాంటి హానీ ఉండదని చెప్పారు. అది నమ్మి వైద్య కళాశాలలో నా కూతురు వ్యాక్సిన్​ తీసుకుంది. ఆమె ఆరోగ్య కార్యకర్తగా కూడా సేవలందించింది. టీకా సురక్షితమని డ్రగ్ కంట్రోలర్ జనరల్ ఆఫ్ ఇండియా (డీజీసీఐ), ఎయిమ్స్ డైరెక్టర్‌​, మహారాష్ట్ర ప్రభుత్వం, కేంద్రం తప్పుడు ప్రచారం చేయడం వల్లే నా కూతురు లాంటి ఆరోగ్య కార్యకర్తలు ఎంతో మంది వ్యాక్సిన్​ తీసుకున్నారు’ అని పేర్కొన్నారు.

తన కూతురు 2021 జనవరి 28న టీకా తీసుకుందని, ఆ తర్వాత దుష్ప్రభావాల కారణంగా మార్చి 1న మరణించిందని లునావత్ పిటిషన్‌లో పేర్కొన్నాడు.  కొవిషీల్డ్ టీకా దుష్ప్రభావాల కారణంగానే నా కుమార్తె మృతి చెందిందని.. ఈ విషయాన్ని కేంద్ర ప్రభుత్వం ఏర్పాటు చేసిన AEFI కమిటీ గతేడాది అక్టోబర్​ 2న వెల్లడించినట్లు తెలిపారు. తన కుమార్తెకు న్యాయం కావాలని, అలాగే ఆమె లాంటి ఎంతో మంది ప్రాణాలు కాపాడేందుకే ఈ పిటిషన్ దాఖలు చేస్తున్నట్లు యువతి తండ్రి తన  పిటిషన్‌లో వివరించారు. దీన్ని గతవారమే దాఖలు చేయగా.. హైకోర్టు విచారణకు ఇంకా తేదీని ఖరారు చేయలేదు.