Manish Sisodia: 16 మంది నిందితుల్లో సిసోదియా నం.1: సీబీఐ ఎఫ్‌ఐఆర్‌

దిల్లీ: దేశ రాజధాని నగరం దిల్లీలో మద్యం విధానంపై దాఖలైన ఎఫ్‌ఐఆర్‌లో 16మంది నిందితుల పేర్లు ఉంటే, అందులో ఉపముఖ్యమంత్రి మనీశ్ సిసోదియా పేరు మొదటి స్థానంలో ఉందని సీబీఐ పేర్కొంది. 16మందితో కూడిన ఈ జాబితాలో సిసోదియా పేరు మొదట్లో ఉన్న ఓ జాబితా వెలుగులోకి వచ్చింది. ఈ జాబితాలో అప్పటి ఎక్సైజ్ శాఖ కమిషనర్ అర్వ గోపీకృష్ణ సహా మరో ముగ్గురు అధికారులు ఉన్నారు. 2021-22 కాలంలో దిల్లీ ప్రభుత్వం ప్రవేశపెట్టిన నూతన అబ్కారీ విధానంలో అవకతవకలు జరిగాయని, మద్యం విధానంలో నిబంధనల ఉల్లంఘన జరగడంతో పాటు విధానపరమైన లోపాలున్నట్లు ఈ నివేదిక పేర్కొంటోంది.

మద్యం విధానంపై దాఖలైన కేసు విచారణలో ఉపముఖ్యమంత్రి మనీశ్ సిసోదియా నివాసంలో సీబీఐ అధికారులు దాడులు నిర్వహించారు. సాయంత్రం సమయానికి కూడా ఈ సోదాలు కొనసాగుతుండటం గమనార్హం. సిసోదియా నివాసంతో పాటు దిల్లీ-ఎన్‌సీఆర్‌ ప్రాంతంలోని 21 చోట్ల ఈ సోదాలు నిర్వహిస్తున్నారు.అబ్కారీ టెండర్ల విధానంలో కొందరికి ఆయాచిత లబ్ధి చేకూర్చేలా ఈ నిర్ణయాలు తీసుకున్నట్లు దిల్లీ ప్రధాన కార్యదర్శి నివేదిక ఇచ్చిన విషయం తెలిసిందే. కాగా ఈ ఉల్లంఘనలపై దర్యాప్తు చేపట్టాలని దిల్లీ లెఫ్టినెంట్‌ గవర్నర్‌ వీకే సక్సేనా.. కేంద్ర దర్యాప్తు సంస్థ (సీబీఐ)కు సిఫార్సు చేశారు. ఈ వ్యవహారంలో ఎక్సైజ్‌శాఖకు ఇన్‌ఛార్జ్‌గా ఉన్న సిసోదియా పాత్రనూ అందులో ప్రస్తావించారు. ఈ క్రమంలోనే ఎఫ్‌ఐఆర్‌ నమోదు చేసిన సీబీఐ.. కేసు దర్యాప్తులో భాగంగా శుక్రవారం సోదాలు చేపట్టింది.