Viral Video: ఇంటి కిటికీలో ఇరుక్కుపోయిన కొండచిలువ.. ఆ తర్వాతేం జరిగిందంటే?

ఇంటర్నెట్‌ డెస్క్‌: మహారాష్ట్ర(Maharashtra)లోని ఠానే నగరంలో షాకింగ్‌ వీడియో ఒకటి నెట్టింట వైరల్‌ అయింది. జనావాసాల్లోకి ప్రవేశించిన ఓ అరుదైన రకానికి చెందిన కొండచిలువ(Python) ఓ పాత భవంతిలోని కిటికీలో ఇరుక్కుపోయి వేలాడుతూ కనిపించడం స్థానికంగా కలకలం రేపింది. ఇంట్లోకి ప్రవేశించే క్రమంలో విండోకి ఉన్న ఇనుప గ్రిల్స్‌లో ఇరుక్కుపోయిన ఈ 10 అడుగుల పొడవైన భారీ కొండ చిలువను కాపాడేందుకు ఇద్దరు వ్యక్తులు ఎంతో సాహసించారు. ఈ కొండచిలువను కాపాడేందుకు ఇంటిపైకి ఎక్కిన వారిద్దరూ దాన్ని బయటకు తీసే ప్రయత్నంలో అది పట్టుకోల్పోయి ఒక్కసారిగా కిందకు పడిపోయిన దృశ్యాలు వీడియోలో రికార్డయ్యాయి. అయితే, ఈ ఘటన ఎప్పుడు జరిగిందో తెలియలేదు. తెలుపు రంగులో కనిపించిన ఈ కొండచిలువ ఆల్బినో బర్మీస్‌ అనే అరుదైన రకానికి చెందినదిగా పేర్కొంటున్నారు.