Avalanche: ముంచుకొచ్చిన.. మంచు ఉప్పెన!

దిల్లీ: ఉత్తరాదిలో కనిష్ఠ ఉష్ణోగత (Least Temparature) లు నమోదవుతుండటంతో చలి తీవ్రత పెరుగుతోంది. మరోవైపు విపరీతంగా కురుస్తున్న మంచుతో జమ్ముకశ్మీర్‌ (jammu Kashmir)లో ఈ ఏడాది తరచూ అవలాంచ్‌లు (Avalache) ఏర్పడుతున్నాయి. ప్రముఖ హిల్‌స్టేషన్‌ సోనామార్గ్‌ (Sonamarg) లో రెండు రోజుల క్రితం భారీ అవలాంచ్‌ (మంచు ఉప్పెన) ఏర్పడిన విషయం తెలిసిందే. తాజాగా అదే ప్రాంతంలో ఇవాళ మరోసారి అంతకు మించిన అవలాంచ్‌ అక్కడున్నవారిని తీవ్ర భయాందోళనకు  గురిచేసింది.

ఓ నిర్మాణ సంస్థ స్థానికంగా సొరంగ మార్గాన్ని నిర్మిస్తోంది. ఈ సంస్థకు చెందిన ఉద్యోగులు అదే ప్రాంతంలో తాత్కాలిక నివాసాలు ఏర్పాటు చేసుకొని ఉంటున్నారు. వారికి సమీపంలో ఈ అవలాంచ్‌ ఏర్పడటంతో  భయంతో పరుగులు తీశారు. అయితే వారంతా సురక్షితంగా ఉన్నట్లు సంస్థ జనరల్‌ మేనేజర్‌ హర్‌పాల్‌ సింగ్‌ వెల్లడించారు. ఆ అవలాంచ్‌కి సంబంధించిన వీడియో చూస్తే.. భయం గొలిపేలా ఉంది. నలువైపుల నుంచి మంచు కొండలు మీద కొస్తున్నట్లుగా ఉంది. దట్టమైన పొగమంచుతో ఆ ప్రాంతమంతా నిండిపోయింది. సాధారణ  పరిస్థితులు నెలకొనే వరకు  గదుల నుంచి  ఎవరూ బయటకు రావొద్దని అధికారులు సూచించారు. ప్రస్తుతం దీనికి సంబంధించిన వీడియో సామాజిక మాధ్యమాల్లో చక్కర్లు కొడుతోంది.