Cyber Crimes: ‘ఒమిక్రాన్‌ టెస్ట్‌ ఉచితం’.. ఇలాంటి ఈ-మెయిళ్లనునమ్మెద్దు!

ఇంటర్నెట్‌ డెస్క్‌: కొవిడ్‌ పరీక్షల విషయంలోనూ సైబర్‌ నేరగాళ్ల బెడద తప్పడం లేదు. దేశంలో ఒకవైపు ఒమిక్రాన్ కేసులు పెరుగుతుండగా.. మరోవైపు ఈ కొత్త వేరియంట్‌ను గుర్తించేందుకు ఉచిత పరీక్షలు నిర్వహిస్తామని ఆశ చూపి, హానికర ఈ-మెయిళ్లతో అమాయకులను బురిడీ కొట్టిస్తున్నారు. కొన్నాళ్లుగా ఈ తరహా మోసాలను గమనించిన కేంద్ర హోంశాఖ సైబర్ ఇన్ఫర్మేషన్ సెక్యూరిటీ విభాగం.. పౌరులంతా ఈ విషయంలో అప్రమత్తంగా ఉండాలని సూచిస్తూ తాజాగా ఓ ప్రకటన జారీ చేసింది.

‘సైబర్‌ నేరగాళ్లు ప్రస్తుత కొవిడ్‌ సంక్షోభ పరిస్థితులను అవకాశంగా మలచుకుంటున్నారు. ఈ క్రమంలోనే కొన్నాళ్లుగా ఒమిక్రాన్‌ సంబంధిత మోసాలు పెరుగుతున్నాయి. కొత్త వేరియంట్‌ నిర్ధారణకు ఉచిత పరీక్షల పేరిట హానికరమైన లింక్స్‌, ఫైళ్లతో ఈ-మెయిల్స్‌ పంపుతున్నారు. పౌరులను బోల్తా కొట్టించేందుకు ప్రభుత్వ, ప్రైవేట్ ఆరోగ్య సంస్థల పేర్లనూ వాడుకుంటున్నారు. ఆ లింక్‌లపై క్లిక్ చేసిన వారిని నకిలీ వెబ్‌సైట్‌లకు మళ్లించి.. వ్యక్తిగత, బ్యాంకింగ్ వివరాలు సేకరిస్తున్నారు. వాటితో ఆర్థిక, సైబర్ నేరాలకు పాల్పడుతున్నారు’ అని అందులో వివరించింది. ఇటువంటి ఈ-మెయిల్స్‌ విషయంలో జాగ్రత్తగా ఉండాలని, వెబ్‌సైట్‌ల ప్రామాణికతను చెక్‌ చేసేందుకు డొమైన్ పేరు, యూఆర్‌ఎల్‌ను పరిశీలించాలని సూచించింది. ఈ తరహా ఘటనలపై cybercrime.gov.inకు సమాచారం అందజేయాలని కోరింది.