MHA: మణిపుర్‌ హింసాత్మక ఘటనలు..! శాంతి స్థాపనకు కమిటీ ఏర్పాటు

ఇంఫాల్: హింసాత్మక ఘటనలతో మణిపుర్‌ (Manipur) అట్టుడికిపోతోన్న విషయం తెలిసిందే. శుక్రవారం సైతం తూటా గాయాలతో ముగ్గురు పౌరులు మృతి చెందారు. మరోవైపు.. రాష్ట్రంలో శాంతి స్థాపన దిశగా కేంద్రం చర్యలు తీసుకుంటోంది. ఈ క్రమంలోనే కేంద్ర హోంశాఖ (MHA) తాజాగా ఓ కమిటీ (Manipur Peace Committee)ని నియమించింది. మణిపుర్‌ గవర్నర్‌ అధ్యక్షతన ఏర్పాటు చేసిన ఈ శాంతి స్థాపన కమిటీలో ముఖ్యమంత్రి, కొందరు మంత్రులు, ఎంపీలు, ఎమ్మెల్యేలు, వివిధ పార్టీలకు చెందిన నాయకులు, ప్రజాసంఘాల నేతలు సభ్యులుగా ఉంటారని పేర్కొంది. జాతుల మధ్య శాంతి స్థాపన ప్రక్రియను సులభతరం చేసేందుకు, వారి మధ్య చర్చల నిర్వహణకు ఈ కమిటీ చొరవ తీసుకుంటుందని ఓ ప్రకటనలో తెలిపింది.

కేంద్ర హోంమంత్రి అమిత్ షా ఇటీవల మణిపుర్‌లో పర్యటించి, పరిస్థితులను సమీక్షించారు. ఈ సందర్భంగా శాంతి కమిటీని ఏర్పాటు చేస్తామని ప్రకటించారు. ఈ మేరకు శనివారం ప్రకటన జారీ అయ్యింది. పౌరుల మధ్య సామాజిక ఐక్యత, పరస్పర అవగాహనను శాంతి కమిటీ బలోపేతం చేస్తుందని హోంశాఖ తెలిపింది. జాతుల మధ్య సంబంధాలను మెరుగుపరుస్తుందని పేర్కొంది. ఇదిలా ఉండగా.. మణిపుర్‌లో మే 3 నుంచి దాడులు, ప్రతిదాడులు జరుగుతున్నాయి. హింసాత్మక ఘటనల్లో ఇప్పటివరకు సుమారు 100 మంది చనిపోగా, 300 మందికిపైగా గాయపడ్డారు. ఈ ఘటనలు, దోపిడీలు, ఆస్తుల విధ్వంసం వెనుకున్న కుట్రను బహిర్గతం చేసేందుకు సీబీఐ ఇప్పటికే 10 మంది సభ్యులతో కూడిన సిట్‌ను ఏర్పాటు చేసింది.