Modi: ఆ విషయంలో ఆస్ట్రేలియా పీఎం హామీ ఇచ్చారు: మోదీ

దిల్లీ: ఆస్ట్రేలియా(Australia)లో భారతీయ సమాజం భద్రతపై ఆ దేశ ప్రధాని ఆంటోనీ ఆల్బనీస్‌(Anthony Albanese) హామీ ఇచ్చారని ప్రధాని మోదీ(Modi) అన్నారు. ఈ మధ్యకాలంలో అక్కడ జరిగిన మతపరమైన దాడులను ఉద్దేశించి ఈ విధంగా స్పందించారు. 

‘ఆస్ట్రేలియా(Australia)లో మతపరమైన దాడుల గురించి వచ్చిన నివేదికలు చూశాను. వాటి గురించి ఆల్బనీస్‌కు వివరించాను. ఆస్ట్రేలియాలో ఉన్న భారతీయ సమాజం భద్రత తమకు అత్యంత ప్రాధాన్యమని ఆయన నాకు మాటిచ్చారు’ అని మోదీ వెల్లడించారు. అలాగే ఇరు దేశాలకు చెందిన అంశాలపై చర్చించిన మోదీ, ఆల్మనీస్.. ఆ వివరాలను మీడియాకు వెల్లడించారు. ‘భారత్‌, ఆస్ట్రేలియా.. క్వాడ్‌లో సభ్యులు. ఈ ఏడాది మేలో జరగనున్న సమావేశం కోసం ఆస్ట్రేలియా పీఎం నన్ను ఆహ్వానించారు. సెప్టెంబర్‌లో జరిగే జీ20(G20) సమావేశానికి హాజరు కావాలని ఆయనకు వెల్లడించాను’ అని ప్రధాని తెలిపారు. వాణిజ్యం, పెట్టుబడులు, రక్షణ రంగం, ఖనిజ తవ్వకాలు వంటి అంశాల్లో సంబంధాలను మెరుగుపరచుకోవడం లక్ష్యంగా ద్వైపాక్షిక చర్చలు జరిపారు. చైనా సైనిక కార్యకలాపాలు పెరుగుతున్న నేపథ్యంలో ఇండో పసిఫిక్‌ ప్రాంతంలో పరిస్థితులపైనా ఇరువురు నేతలు సమీక్ష జరిపారు.

గురువారం ఈ ఇద్దరు నేతలు బోర్డర్‌ - గావస్కర్‌ (Border-Gavaskar series) సిరీస్‌లో భాగంగా అహ్మదాబాద్‌లో జరుగుతోన్న నాలుగో టెస్టు మ్యాచ్‌ను వీక్షించారు. 75 ఏళ్ల ఇండో-ఆస్ట్రేలియా మైత్రి సంబరాల్లో భాగంగా మోదీ (Narendra Modi), ఆల్బనీస్‌ (Anthony Albanese) స్టేడియానికి వచ్చారు.