Parliament వర్షాకాల సమావేశాలకు డేట్‌ ఫిక్స్‌!

దిల్లీ: పార్లమెంట్‌ వర్షాకాల సమావేశాలకు ముహూర్తం ఖరారైనట్టు తెలుస్తోంది. ఉభయ సభల సమావేశాలు జులై 19న ప్రారంభమై ఆగస్టు 13తో ముగియనున్నట్టు సమాచారం. దాదాపు నెల రోజుల పాటు కొనసాగనున్న ఈ సమావేశాల్లో 20 సిట్టింగ్‌లు ఉండే అవకాశం ఉంది. సాధారణంగా జులై మూడో వారంలో పార్లమెంట్‌ సమావేశాలు ప్రారంభమై.. స్వాతంత్ర్య దినోత్సవ వేడుకలకు ముందు ముగుస్తుంటాయి. పార్లమెంటరీ వ్యవహారాల కేబినెట్‌ కమిటీ సిఫారసు మేరకు ఈ తేదీలు ఖరారు చేసినట్టు తెలుస్తోంది. పార్లమెంట్‌ కాంప్లెక్స్‌లో కొవిడ్‌ నిబంధనల మధ్య ఈ సమావేశాలను నిర్వహించనున్నారు. మరోవైపు, కరోనా సెకండ్‌ వేవ్‌ను ఎదుర్కోవడంలో కేంద్రం వైఫల్యం, వ్యవసాయ చట్టాలు రద్దు తదితర అంశాలపై విపక్షాలు చర్చకు పట్టుబట్టే అవకాశం ఉంది.