Flight: రష్యా-గోవా విమానానికి మరోసారి బాంబు బెదిరింపు..

పనాజీ: రష్యా (Russia) నుంచి గోవా (Goa) బయల్దేరిన ఓ విమానానికి బాంబు బెదిరింపు వచ్చింది. దీంతో విమానాన్ని (Flight) దారిమళ్లించినట్లు గోవా పోలీసులు తెలిపారు. 240 మంది ప్రయాణికులు, సిబ్బందితో మాస్కో నుంచి బయల్దేరిన అజుర్‌ ఎయిర్‌ విమానం షెడ్యూల్‌ ప్రకారం శనివారం తెల్లవారుజామున 4.15 గంటలకు దక్షిణ గోవాలోని డబోలిమ్‌ ఎయిర్‌పోర్టులో ల్యాండ్‌ అవ్వాల్సి ఉంది. అయితే ఈ విమానం భారత గగనతలంలోకి రాకముందే బాంబు బెదిరింపు (Bomb Threat) వచ్చింది.

అజుర్‌ ఎయిర్‌ విమానంలో బాంబు ఉన్నట్లు ఈ తెల్లవారుజామున డబోలిమ్‌ ఎయిర్‌పోర్టు డైరెక్టర్‌కు గుర్తుతెలియని వ్యక్తి నుంచి ఈ-మెయిల్‌ వచ్చినట్లు అధికారులు తెలిపారు. దీంతో అప్రమత్తమైన విమానాశ్రయ సిబ్బంది అధికారులకు సమాచారమిచ్చారు. అయితే అప్పటికి విమానం ఇంకా భారత గగనతలంలోకి రాకపోవడంతో విమానాన్ని ఉజ్బెకిస్థాన్‌కు మళ్లించినట్లు అధికారులు తెలిపారు. దీనిపై మరిన్ని వివరాలు తెలియాల్సి ఉంది.

రెండు వారాల క్రితం కూడా మాస్కో నుంచి గోవా వచ్చిన ఓ అజుర్‌ ఎయిర్‌ విమానానికి బాంబు బెదిరింపు (Bomb Threat) రావడం కలకలం సృష్టించిన విషయం తెలిసిందే. దీంతో ఆ విమానాన్ని గుజరాత్‌లోని జామ్‌నగర్‌ ఎయిర్‌పోర్టులో అత్యవసరంగా దించేసి తనిఖీలు చేపట్టారు. అయితే, ఆ తర్వాత అది ఉత్తుత్తి బెదిరింపేనని తేలడంతో అధికారులు ఊపిరిపీల్చుకున్నారు.