Mumbai: ముంబయిలో భవనం కుప్పకూలి 14మంది మృతి!

ముంబయి: మహారాష్ట్ర రాజధాని ముంబయిలోని కుర్లా ప్రాంతంలో ఘోర ప్రమాదం చోటుచేసుకుంది. ఓ నాలుగు అంతస్తుల భవనం కుప్పకూలిన ఘటనలో 14మంది ప్రాణాలు కోల్పోయినట్లు అధికారులు వెల్లడించారు. సోమవారం రాత్రి ఈ దుర్ఘటన జరగగా.. అప్పటి నుంచి యుద్ధప్రాతిపదికన సహాయక చర్యలు సాగుతున్నాయి. శిథిలాల కింది నుంచి తొలుత ముగ్గురి మృతదేహాలను వెలికితీసిన సహాయక బృందాలు.. తాజాగా మరికొందరి మృతదేహాలను వెలికి తీశారు. ఇప్పటివరకు మొత్తంగా 23 మందిని కాపాడినట్లు అధికారులు వెల్లడించారు. గాయపడ్డ వారిని ఆస్పత్రికి తరలించి చికిత్స అందిస్తున్నట్లు తెలిపారు.

ఘటనపై సమాచారం అందుకున్న మహారాష్ట్ర మంత్రి, సీఎం ఉద్ధవ్‌ ఠాక్రే కుమారుడు ఆదిత్య ఠాక్రే సంఘటన స్థలాన్ని పరిశీలించారు. యుద్ధప్రాతిపదికన సహాయక చర్యలు చేపట్టాలని అధికారులను ఆదేశించారు. మృతుల కుటుంబాలకు సానుభూతి తెలియజేశారు. శిథిలావస్థలో ఉన్న భవనాల యజమానులకు గతంలోనే నోటీసులు అందించామని, వాటిని సీరియస్‌గా తీసుకోవాలని అభ్యర్థించారు.

మృతుల కుటుంబాలకు రూ. 5లక్షల పరిహారం

మృతుల కుటుంబానికి మహారాష్ట్ర ప్రభుత్వం రూ. 5లక్షల పరిహారం ప్రకటించింది. గాయపడిన వారికి ఉచిత చికిత్స అందిస్తామని తెలిపింది. ఈ దుర్ఘటనపై విచారణ జరిపి బాధ్యులపై చర్యలు తీసుకుంటామని మహామంత్రి సుభాష్ దేశాయ్ వెల్లడించారు. ఇలాంటి ఘటనలు పునరావృతం కాకుండా చూసేందుకు సమావేశం ఏర్పాటు చేసినట్లు తెలిపారు.