Mumbai airport: ముంబయి ఎయిర్‌పోర్టుకు ఉగ్ర బెదిరింపులు

ఇంటర్నెట్‌డెస్క్‌: ముంబయి(Mumbai)లో ఛత్రపతి శివాజీ మహారాజ్‌ అంతర్జాతీయ విమానాశ్రయానికి(Mumbai airport) ఇండియన్‌ ముజాహిద్దీన్‌ పేరిట ఉగ్ర బెదిరింపులు వచ్చాయి. దీంతో విమానాశ్రయంలో హైఅలర్ట్‌ ప్రకటించారు. సోమవారం ఈ బెదిరింపు కాల్ వచ్చినట్లు సమాచారం. కాల్‌ చేసిన వ్యక్తి తాను ఇండియాన్‌ ముజాహిద్దీన్‌లోని సభ్యుడు ఇర్ఫాన్‌ అహ్మద్‌ షేక్‌గా చెప్పుకొన్నాడు. ఈ ఘటన సోమవారం రాత్రి 10 గంటల సమయంలో చోటు చేసుకొంది. వెంటనే అప్రమత్తమైన ఎయిర్‌ పోర్టు అధికారులు ముంబయి పోలీసులకు సమాచారం ఇచ్చారు. విమానాశ్రయ ఏజెన్సీలతోపాటు ముంబయి పోలీసులు ఈ ఘటనపై దర్యాప్తును మొదలుపెట్టారు. 

ఈ నెల 10వ తేదీన ప్రధాని నరేంద్రమోదీ ఒక రోజు పర్యటన నిమిత్తం ముంబయి(Mumbai)కి రానున్నారు. దీంతో సోమవారం నుంచే భద్రతా ఏర్పాట్లు మొదలుపెట్టారు. ముంబయి విమానాశ్రయ ప్రాంతంలో డ్రోన్ల వినియోగంపై ఆంక్షలు విధించారు. ప్రధాని ఈ పర్యటనలో దావుదీ బొహ్రా కమ్యూనిటీకి చెందిన అరబిక్‌ అకాడమీని ఆయన ప్రారంభించనున్నారు. దీంతోపాటు కొలాబాలోని నావికాదళ స్థావరాన్ని కూడా సందర్శించే అవకాశాలున్నాయి. ఈ సమయంలో ముంబయి విమానాశ్రయానికి ఉగ్ర బెదరింపులు రావడంతో భద్రతా ఏజెన్సీలను ఉలిక్కిపడేలా చేశాయి.