Twitter: కొత్త రూల్స్‌ పాటించాల్సిందే: హైకోర్టు  

దిల్లీ: కొత్త ఐటీ చట్టంలోని డిజిటల్‌ మీడియా నిబంధనలను ప్రముఖ సోషల్‌ మీడియా దిగ్గజం ట్విటర్‌ పాటించాల్సిందేనని దిల్లీ హైకోర్టు ఆదేశించింది. కేంద్ర ప్రభుత్వం జారీచేసిన నిబంధనలను ట్విటర్‌ పాటించడంలేదంటూ అమిత్‌ ఆచార్య అనే న్యాయవాది దాఖలు చేసిన పిటిషన్‌పై విచారణ జరిపింది. ఈ అంశంపై తమ వైఖరి చెప్పాలంటూ కేంద్రంతో పాటు ట్విటర్‌కు దిల్లీ హైకోర్టు జడ్జి జస్టిస్‌ రేఖ పల్లి నోటీసులు జారీచేశారు. నూతన ఐటీ చట్టంలోని నిబంధనలను పాటిస్తున్నామని, రెసిడెంట్‌ గ్రీవెన్స్ అధికారిని సైతం నియమించినట్లు ట్విటర్‌ కోర్టుకు తెలిపింది. అయితే ట్విటర్ వాదనను కేంద్రం తప్పు పట్టింది. ఇరు పక్షాల వాదనలను విన్న న్యాయమూర్తి.. కొత్త నిబంధనలను పాటించాల్సిందేనని తేల్చి చెప్పారు. తదుపరి విచారణ వాయిదా వేశారు.