Temjen Imna Along: మోదీ, నేను.. ఎందుకు నవ్వుతున్నామో చెప్పండి..!

దిల్లీ: చమత్కారాలు విసురుతూ, జోకులు పేలుస్తూ నెట్టింట్లో నవ్వులు పూయిస్తుంటారు నాగాలాండ్ మంత్రి తెమ్జెన్‌ ఇమ్నా అలోంగ్(Temjen Imna Along). తాజాగా ఆయన ప్రధాని నరేంద్ర మోదీ(Modi)తో ఉన్న చిత్రాన్ని షేర్ చేసి.. తామిద్దరం ఎందుకు నవ్వుతున్నామో చెప్పండి చూద్దాం అని నెటిజన్లను అడిగారు. 

‘గురువుతో ఉంటే చింతించాల్సిన పని ఏముంది. అగ్రనేతల నుంచి జ్ఞానాన్ని పొందడం గొప్ప గౌరవం. మేమిద్దరం ఎందుకు నవ్వుతున్నామో చెప్పండి చూద్దాం’ అని మోదీతో దిగిన చిత్రాన్ని ఉద్దేశించి తెమ్జెన్‌ పోస్టు పెట్టారు. దీనిపై విపరీత స్పందన వచ్చింది. ‘మిమ్మల్ని కలుసుకోవడమే నిజమైన సంతోషం. అక్కడ మీ నవ్వులకు అదే కారణం కావొచ్చు’, ‘మీ చిన్నప్పటి వీడియో ఏదైనా చూపించారా..?’ ‘గురువు గారూ.. మిమ్మల్ని పెళ్లి చేసుకోమని అడిగి ఉంటారు’ అని పలువురు కామెంట్లు పెట్టారు.