Pravasi Bharatiya Diwas:దేశానికి నిజమైన ప్రతినిధులు ప్రవాస భారతీయులే

ఉప రాష్ట్రపతి ఎం.వెంకయ్యనాయుడు

ఇంటర్నెట్‌ డెస్క్‌: దేశాభివృద్ధికి తోడ్పడేందుకు ప్రవాస భారతీయులు కృషి చేయాలని ఉప రాష్ట్రపతి ఎం.వెంకయ్యనాయుడు పిలుపునిచ్చారు. ఆదివారం ప్రవాస భారత దినోత్సవం పురస్కరించుకుని ఉప రాష్ట్రపతి.. ఎన్నారైల విజయాలను అభినందిస్తూ, వారికి శుభాకాంక్షలు తెలిపారు. భారత ప్రపంచ దృష్టికోణానికి నిజమైన ప్రతినిధులు ప్రవాస భారతీయులేనని కొనియాడారు. వారంతా.. దేశ సాంస్కృతిక రాయబారులుగా కొనసాగాలని కోరారు. ‘ఆజాదీ కా అమృత్‌ మహోత్సవ్‌’ కొనసాగుతోన్న ప్రస్తుత తరుణంలో.. దేశ అభివృద్ధిలో భాగస్వాములు కావాలని ఆకాంక్షించారు. ఈ మేరకు ఉపరాష్ట్రపతి సెక్రెటేరియట్ ట్వీట్ చేసింది.

ప్రధాని నరేంద్ర మోదీ సైతం ప్రవాస భారతీయుల సేవలను కొనియాడుతూ.. శుభాకాంక్షలు తెలిపారు. ‘ఎన్నారైలు ప్రపంచవ్యాప్తంగా తమకంటూ ఓ ప్రత్యేకతను చాటుకున్నారు. వివిధ రంగాల్లోనూ రాణిస్తున్నారు. అదే సమయంలో.. తమ మూలాలను మర్చిపోలేదు. వారి విజయాలకు గర్విస్తున్నాం’ అని ట్వీట్‌ చేశారు. దేశాభివృద్ధిలో ప్రవాస భారతీయుల సహకారానికి గుర్తుగా ఏటా జనవరి 9న ప్రవాస భారత దినోత్సవం నిర్వహిస్తుంటారు. 1915లో ఈ రోజునే మహాత్మా గాంధీ దక్షిణాఫ్రికా నుంచి భారత్‌కు తిరిగొచ్చి.. తదనంతరం స్వాతంత్ర్య పోరాటానికి నాయకత్వం వహించడం విశేషం.