అంతర్జాతీయ ప్రయాణికులకు కొత్త మార్గదర్శకాలు

దిల్లీ: వివిధ దేశాల నుంచి భారత్‌కు వచ్చే అంతర్జాతీయ ప్రయాణికులకు సంబంధించి కేంద్రప్రభుత్వం బుధవారం కొత్త మార్గదర్శకాలు జారీచేసింది. వివిధ దేశాల్లో కరోనా కొత్త రకాలు పుట్టుకొస్తున్న తరుణంలో ఇవి జారీ అవడం గమనార్హం. కొత్త ప్రామాణిక నిర్వహణ విధానాలు ఈ నెల 22 అర్ధరాత్రి 11.59 గంటల నుంచి తదుపరి ఆదేశాలు వెలువడేవరకు అమల్లో ఉంటాయి. బ్రిటన్, ఐరోపా, మధ్యప్రాచ్యం నుంచి వచ్చే ప్రయాణికులకు సంబంధించి ప్రత్యేక మార్గదర్శకాలను కేంద్రం వెలువరించింది. అదే సమయంలో ఈ నెల 28 వరకు అంతర్జాతీయ విమానాల రాకపోకలను నిషేధించింది. కొత్త మార్గదర్శకాల ప్రకారం బ్రిటన్, ఐరోపా, మధ్యప్రాచ్యం నుంచి వచ్చే ప్రయాణికులు ప్రయాణం మొదలవడానికి ముందే ఎయిర్‌ సువిధ వెబ్‌సైట్‌లో స్వీయ ధ్రువీకరణ ఇవ్వాల్సి ఉంటుంది. కొవిడ్‌-19 ఆర్‌టీ-పీసీఆర్‌ పరీక్షలో నెగెటివ్‌ ఫలితం నివేదికను అప్‌లోడ్‌ చేయాలి.