Indian Railway: వాళ్లంతా పదేళ్లు క్షేత్ర స్థాయిలో పని చేయాల్సిందే: రైల్వే బోర్డు

దిల్లీ: రైల్వే బోర్డు (Railway Board) కీలక నిర్ణయం తీసుకుంది. ఇకపై రైల్వేలో కొత్తగా నియమితులైన గ్రూప్‌ A (Group A Employees) ఉద్యోగులంతా కనీసం 10 ఏళ్లపాటు క్షేత్రస్థాయిలో పని చేయాలని, ఆ తర్వాతే ప్రధాన కార్యాలయం (Head Quarters)లో పని చేసేందుకు అర్హులవుతారని పేర్కొంది. ఈ మేరకు రైల్వే నిబంధనల్లో మార్పులు చేసింది. ప్రస్తుత నిబంధనల ప్రకారం.. కొత్తగా ఉద్యోగంలో చేరిన వారు కూడా రైల్వే ప్రధాన కార్యాలయంలో పని చేసేందుకు వీలుంది. కానీ, క్షేత్రస్థాయిలో పని చేసిన అనుభవాన్ని పొందేందుకే ఈ మార్పులు చేసినట్లు తెలుస్తోంది.

‘‘ నేరుగా ఉద్యోగంలో చేరిన గ్రూప్‌ -A స్థాయి ఉద్యోగులు క్షేత్రస్థాయిలో తగినంత అనుభవం సాధించేందుకు మొదటి 10 సంవత్సరాల సర్వీను క్షేత్ర స్థాయిలోనే పూర్తి చేయాలి. ఆ తర్వాతే ప్రధాన కార్యాలయంలో ఉద్యోగం పొందేందుకు అర్హత సాధిస్తారు’’ అని రైల్వే రిక్రూట్‌మెంట్‌ బోర్డు వెల్లడించింది. క్షేత్రస్థాయి పరిస్థితుల గురించి ఓ అవగాహన ఉంటే..  తీసుకునే నిర్ణయాలు స్పష్టంగా ఉంటాయని సీనియర్‌ ఉద్యోగి ఒకరు తెలిపారు. ‘‘క్షేత్ర స్థాయిలో పని చేయడం వల్ల ప్రాథమిక స్థాయిలో ఏం జరుగుతుందనేది వాళ్లకు తెలుస్తుంది.’’ అని ఆయన అన్నారు.

ఇటీవల నల్గొండ జిల్లా బీబీనగర్‌ సమీపంలో రైలు పట్టాలు తప్పిన తర్వాత జరిగిన సమావేశంలో రైల్వే బోర్డు ఛైర్మన్‌  ఏకే లహోటి మాట్లాడుతూ.. దేశవ్యాప్తంగా ఉన్న జనరల్‌మేనేజర్లు, డివిజినల్‌ మేనేజర్లు స్వయంగా ప్రమాద స్థలానికి వెళ్లి పరిష్కారాలను కనుగొనాలని చెప్పిన సంగతి తెలిసిందే.‘‘ క్షేత్రస్థాయిలో పని చేయడం చాలా శ్రమతో కూడుకున్నది. సంస్థకు కూడా క్షేత్రస్థాయిలో పని చేసే వారి అవసరం ఉంది.యువ అధికారులు అక్కడ పని చేస్తే సవాళ్లను ఎదుర్కోవడం మరింత సులువవుతుంది. అందుకే రైల్వే బోర్డు ఈ నిర్ణయం తీసుకొని ఉండొచ్చు’’ అని మరో సీనియర్‌ అధికారి తెలిపారు.

మరోవైపు అత్యవసర సందర్భాల్లో జనరల్‌మేనేజర్‌ స్థాయి అధికారి ఆమోదంతోనే ఒక ఉద్యోగి ప్రధాన కార్యాలయంలో పని చేసేందుకు వీలుందని ఫిబ్రవరి 21న జారీ చేసిన ఉత్తర్వులోనూ రైల్వేబోర్డు పేర్కొంది. రైళ్ల రాకపోకల నుంచి, విధానాల రూపకల్పన వరకు, సాంకేతిక అంశాల నుంచి ఆదాయం వరకు మొత్తం యాంత్రాంగాన్ని గ్రూప్‌- A ఉద్యోగులే పర్యవేక్షిస్తారు. వీరందర్నీ యూపీఎస్సీ ద్వారా నియమిస్తారు.