Rajasthan: ఐసీయూలో శిశువుల మరణాలపై నివేదిక ఇవ్వండి : జాతీయ మానవ హక్కుల కమిషన్‌

దిల్లీ: రాజస్థాన్‌లోని అజ్మేర్‌ జిల్లా ప్రభుత్వ ఆసుపత్రిలో అత్యవసర విభాగం(ఐసీయు)లో చికిత్స పొందుతున్న ఇద్దరు శిశువులు వార్మర్ల వేడి ఎక్కువైన కారణంగా చనిపోయారు. ఈ  ఘటనకు సంబంధించి రాష్ట్ర ప్రభుత్వానికి జాతీయ మానవ హక్కుల కమిషన్‌ నోటీసులు జారీ చేసింది. ఆరు వారాల్లో ఘటనపై వివరణాత్మక నివేదిక ఇవ్వాలని అందులో పేర్కొంది. ఈ ఘటనపై దర్యాప్తు ఎంత వరకు వచ్చింది.. బాధ్యులపై ఎలాంటి చర్యలు తీసుకున్నారు.. బాధిత కుటుంబాలకు ఎలాంటి సాయం చేశారు? తదితర వివరాలను ఆ నివేదికలో పొందుపరచాలని ప్రభుత్వాన్ని ఆదేశించింది. మీడియాలో వచ్చిన కథనాల ఆధారంగా ఈ ఘటనను సుమోటోగా స్వీకరించిన్నట్లు జాతీయ మానవ హక్కుల కమిషన్‌ తెలిపింది. రాత్రి సమయంలో ఉష్ణోగ్రతల్లో హెచ్చుతగ్గులు వచ్చాయని సిబ్బంది అది గమనించకపోవడంతో మరణాలు సంభవించాయని ఆ వార్తల్లో పేర్కొన్నారు. ఆ సమయంలో ఐసీయులో 20మంది శిశువులు చికిత్స పొందుతున్నట్లు తెలిపారు.