NIA: ఐసిస్‌తో లింకులు.. ఆరు రాష్ట్రాల్లో ఎన్‌ఐఏ ఏకకాలంలో సోదాలు

దిల్లీ: జాతీయ దర్యాప్తు సంస్థ(NIA) దేశంలోని ఆరు రాష్ట్రాల్లో ఏకకాలంలో దాడులు నిర్వహించింది. మహారాష్ట్ర, గుజరాత్​, కర్ణాటక, ఉత్తర్‌ప్రదేశ్​, బిహార్​, మధ్యప్రదేశ్‌లో ఐసిస్ (ISIS) ​ఉగ్రవాద కార్యకలపాలకు సంబంధించి 13 ప్రాంతాల్లో సోదాలు నిర్వహించింది. మహారాష్ట్రలోని నాందేడ్​, కొల్హాపుర్.. గుజరాత్‌లోని భరుచ్​, సూరత్​, నవ్​సారి, అహ్మదాబాద్‌లో సోదాలు చేసింది. కర్ణాటకలోని భత్కల్​, తుమ్​కుర్.. బిహార్‌లోని ఆరియా.. మధ్యప్రదేశ్‌ రాజధాని భోపాల్​.. యూపీలోని దియోబంద్‌ జిల్లాలో ఈ సోదాలు చేపట్టింది. ఈ దాడుల్లో కీలక పత్రాలు, వస్తువులను స్వాధీనం చేసుకున్నట్లు అధికారులు తెలిపారు. ఐసిస్‌ ఉగ్రవాద కార్యకలాపాలకు సంబంధించి ఓ కేసును సుమోటోగా తీసుకున్న ఎన్ఐఏ జూన్​25న పలు సెక్షన్ల కింద కేసు నమోదు చేసి.. ఈ సోదాలు నిర్వహించింది.

ఉగ్రవాద సంస్థలతో సంబంధమున్న కర్ణాటకలోని భత్కల్‌కు చెందిన ఓ వ్యక్తిని ఈ దాడుల్లో అదుపులోకి తీసుకున్నట్లు తెలుస్తోంది. ఆదివారం ఉదయం దాడులు చేపట్టి.. 30ఏళ్ల వ్యక్తిని అరెస్టు చేసినట్లు సమాచారం. మరోవైపు ఈ దాడుల్లో ముగ్గురిని అదుపులోకి తీసుకుని విచారిస్తున్నామని గుజరాత్​యాంటీ టెర్రరిజం స్క్వాడ్​తెలిపింది. తీవ్రవాద సంస్థ పాపులర్​ఫ్రంట్​ఆఫ్ ఇండియా(పీఎఫ్‌ఐ)తో సంబంధం ఉందన్న ఆరోపణలతో బిహార్‌లోని నలంద జిల్లాలో గురువారమే సోదాలు నిర్వహించింది.

కేరళలోనూ దాడులు నిర్వహించింది. పోలీసులపై హత్యాయత్నం చేసిన సతిక్​బచ్చాకు సంబంధించిన కేసులో ఈ దాడులు చేపట్టింది. తిరువనంతపురంలో నిర్వహించిన  సోదాల్లో ఎలక్ట్రానిక్​వస్తువులు, పలు పత్రాలను స్వాధీనం చేసుకున్నట్లు అధికారులు పేర్కొన్నారు. బిహార్‌లోనూ పీఎఫ్‌ఐతో సంబంధం ఉన్న ముగ్గురి ఇళ్లలో అధికారులు దాడులు చేసి పలు పత్రాలు స్వాధీనం చేసుకున్నారు.