Parakala Vangamayi: నిరాడంబరంగా నిర్మలా సీతారామన్‌ - పరకాల ప్రభాకర్‌ కుమార్తె వివాహం

దిల్లీ: రాజకీయ ప్రముఖుల ఇళ్లలో పెళ్లంటే మామూలుగా ఉండదు. భారీ సెట్టింగులు, కళ్లు మిరుమిట్లుగొలిపే బాణసంచాలు.. రకరకాల వంటకాలతో ధూం ధామ్‌ అనిపిస్తుంటారు. రాజకీయ ప్రముఖులు, అధికారుల రాకతో ఎటు చూసినా సందడి వాతావరణమే. కానీ, అందుకు భిన్నంగా కేంద్ర ఆర్థికశాఖ మంత్రి నిర్మలా సీతారామన్‌ (Nirmala Sitharaman), పరకాల ప్రభాకర్‌ (Parakala Prabhakar) దంపతులు తమ కుమార్తె వాజ్ఞ్మయి (Parakala Vangamayi) వివాహాన్ని అత్యంత నిరాడంబరంగా జరిపించి ప్రత్యేకంగా నిలిచారు.

పరకాల వాజ్ఞ్మయి వివాహం ప్రతీక్‌తో గురువారం నిరాడంబరంగా జరిగింది. కేవలం కొద్ది మంది కుటుంబ సభ్యుల సమక్షంలో వివాహ వేడుక జరిపించారు. రాజకీయ ప్రముఖులెవరూ ఈ కార్యక్రమానికి హాజరుకాలేదు. ఉడిపిలోని అదమరు మఠ్‌కు చెందిన పురోహితులు బ్రాహ్మణ సంప్రదాయం ప్రకారం వివాహ క్రతువు నిర్వహించారు. పెళ్లి సమాచారాన్ని సీతారామన్‌ కుటుంబసభ్యులు అధికారికంగా బయటకి వెల్లడించకున్నా.. వివాహ చిత్రాలు సామాజిక మాధ్యమాల్లో వైరల్‌గా మారాయి.