NRC: ఎన్‌ఆర్‌సీపై ఇంకా ఏ నిర్ణయమూ తీసుకోలేదు: కేంద్రం

దిల్లీ: దేశవ్యాప్తంగా జాతీయ పౌర పట్టిక(ఎన్‌ఆర్‌సీ)ని సిద్ధం చేసే అంశంపై ప్రభుత్వం ఇంకా ఎలాంటి నిర్ణయమూ తీసుకోలేదని కేంద్ర హోంశాఖ సహాయ మంత్రి నిత్యానంద్‌ రాయ్‌ స్పష్టంచేశారు. సుప్రీంకోర్టు ఆదేశాల మేరకు అసోంలో ఎన్‌ఆర్‌సీకి సంబంధించిన అనుబంధ జాబితా, మినహాయింపు జాబితాను 2019 ఆగస్టు 31న ప్రచురించినట్టు తెలిపారు. ఇప్పటివరకు దేశవ్యాప్తంగా జాతీయ పౌర పట్టికను సిద్ధం చేసే అంశంపై కేంద్ర ప్రభుత్వం ఎలాంటి నిర్ణయమూ తీసుకోలేదని లోక్‌సభలో ఓ సభ్యుడు అడిగిన ప్రశ్నకు నిత్యానంద్‌ రాయ్‌ లిఖితపూర్వక సమాధానంలో పేర్కొన్నారు. 

2019లో కేంద్రం అసోంలో ఎన్‌ఆర్‌సీని అప్‌డేట్‌ చేసి తుది జాబితాను విడుదల చేసింది. మొత్తం 3.30 కోట్ల మంది దరఖాస్తుదారుల్లో 3.11 కోట్ల మందిని చట్టబద్ధంగా నివసించే స్థానికులుగా గుర్తించిన కేంద్ర హోంశాఖ.. ఈ జాబితాలో 19.06లక్షల మందికి పైగా ప్రజల్ని చేర్చకపోవడం అప్పట్లో పెద్ద రాజకీయ దుమారానికి కారణమైన విషయం తెలిసిందే.