Nirmala Sitharaman: ఏ రాష్ట్రానికీ ప్రత్యేక హోదా ఇవ్వం.. నిర్మలా సీతారామన్‌

భువనేశ్వర్‌: ఏ రాష్ట్రానికీ కొత్తగా ప్రత్యేక కేటగిరీ హోదా(Special Category Status) ఉండదని  కేంద్ర ఆర్థిక మంత్రి నిర్మలా సీతారామన్‌(Nirmala Sitharaman) తేల్చి చెప్పారు. ఒడిశాలోని భువనేశ్వర్‌లో మీడియాతో మాట్లాడిన ఆమె ఈ విషయాన్ని స్పష్టంచేశారు. ఒడిశాకు ప్రత్యేక కేటగిరీ హోదా ఇవ్వాలంటూ ఆ రాష్ట్ర ప్రభుత్వం నుంచి మరోసారి డిమాండు వస్తోన్న నేపథ్యంలో ఆమె స్పందించారు. ఇకపై ఏ రాష్ట్రానికీ ప్రత్యేక హోదా ఉండదని గతంలోనే ఆర్థిక సంఘం స్పష్టంచేసిందని తెలిపారు. ఇటీవల పార్లమెంట్‌లో తాను ప్రవేశపెట్టిన కేంద్ర బడ్జెట్‌- 2023-24లో మహాత్మాగాంధీ జాతీయ ఉపాధి హామీ పథకానికి(MGNREGS) నిధుల కేటాయింపులో భారీగా కోత విధించారన్న విమర్శలను కొట్టిపారేశారు. నరేగాకు నిధుల కేటాయింపులు తగ్గలేదని.. ఈ పథకం డిమాండ్‌ ఆధారితమైంది గనక అందుకనుగుణంగా  నిధుల కేటాయింపులు పెంచుతూ చివరలో సవరణలు చేస్తున్నామన్నారు. గత ఏడెనిమిది బడ్జెట్‌లను సమీక్షిస్తే.. ఆ విషయం అర్థమవుతుందని చెప్పారు. బడ్జెట్‌లో నిధులు కేటాయించడం ఒక ఎత్తయితే.. క్షేత్రస్థాయి పరిస్థితులను పర్యవేక్షించి డిమాండ్‌కు అనుగుణంగా సవరించడం మరో విధానమని వెల్లడించారు.   

అదానీ-హిండెన్‌బర్గ్‌ వ్యవహారంపై సెబీ దర్యాప్తుపై ఏమైనా అప్‌డేట్‌ ఉందా అని విలేకర్లు అడగ్గా.. ‘‘సెబీ ఓ స్వతంత్ర రెగ్యులేటరీ సంస్థ. వాళ్లు ఏం గుర్తించినా.. ఎలాంటి సోదాలు చేసినా.. అది వారి వద్దే ఉంటుంది. ప్రతి అంశాన్నీ వారు ప్రభుత్వానికి నివేదించరు. ఈ అంశం కోర్టులో ఉంది. అందువల్ల దీనిపై వ్యాఖ్యానించడం సరికాదు’’ అని నిర్మలమ్మ తెలిపారు.