Indigo: విమానంలో ప్రయాణికుల అసభ్య ప్రవర్తన వార్తలు.. ఖండించిన ఇండిగో

దిల్లీ: దేశీయ విమానంలో కొందరు ప్రయాణికులు మద్యం సేవించి సిబ్బందితో అసభ్యంగా ప్రవర్తించారంటూ వచ్చిన వార్తలను ప్రముఖ ఎయిర్‌లైన్‌ ఇండిగో (Indigo) ఖండించింది. అలాంటి వివాదాస్పద ఘటనేదీ జరగలేదని ట్విటర్‌ వేదికగా స్పష్టం చేసింది. ‘‘దిల్లీ (Delhi) - పట్నా (Patna) విమానంలో జరిగిన ఘటనకు సంబంధించి అధికారులు దర్యాప్తు చేస్తున్నారు. కొన్ని సోషల్‌మీడియాల్లో వస్తున్నట్లుగా ఆ విమానంలో వివాదాస్పద, ఘర్షణపూరిత ఘటనేదీ జరగలేదు’’ అని ఇండిగో వెల్లడించింది.

ఆదివారం రాత్రి దిల్లీ నుంచి పట్నా వచ్చిన ఇండిగో విమానంలో ముగ్గురు ప్రయాణికులు మద్యం మత్తులో రచ్చరచ్చ చేసినట్లు ఈ ఉదయం వార్తలు వచ్చిన విషయం తెలిసిందే. వీరు ఎయిర్‌హోస్టస్‌ను వేధించడమే గాక, అడ్డొచ్చిన కెప్టెన్‌పై దాడి చేసినట్లు తొలుత కథనాలు వెలువడ్డాయి. నిందితులకు ఓ రాజకీయ పార్టీతో సంబంధం ఉన్నట్లు జాతీయ మీడియా కథనాలు పేర్కొన్నాయి. ఈ నేపథ్యంలోనే ఇండిగో (Indigo) స్పష్టతనిచ్చింది. అయితే, దేశీయ విమానంలో నిబంధనలకు విరుద్ధంగా మద్యం సేవించినందుకు గానూ ఇద్దరు ప్రయాణికులను అరెస్టు చేసినట్లు ఆ తర్వాత అధికారిక వర్గాలు వెల్లడించాయి. విమానంలో ఘర్షణలాంటి ఘటనలేం జరగలేదని, అయితే ప్రొటోకాల్‌ ప్రకారం.. మద్యం సేవించినందుకు వారిపై ఎయిర్‌పోర్టు అధికారులకు ఇండిగో ఫిర్యాదు చేసినట్లు పేర్కొన్నాయి.

‘‘దేశీయ విమానాల్లో మద్యం సేవించడం నిషేధం. కానీ, ఆ ప్రయాణికులు విమానం ఎక్కేముందే మద్యం సేవించి ఉన్నారు. విమానంలోనూ తాగేందుకు ప్రయత్నించారు. అయితే సిబ్బంది వారిని అడ్డుకున్నారు. విమానం ల్యాండ్‌ అయిన తర్వాత ఇండిగో (Indigo) సిబ్బంది ఫిర్యాదు మేరకు సీఐఎస్‌ఎఫ్‌ పోలీసులు ఆ ప్రయాణికులను అదుపులోకి తీసుకున్నారు. ఆ తర్వాత వారిని ఎయిర్‌పోర్టు పోలీసులకు అప్పగించారు’’ అని సదరు వర్గాలు స్పష్టం చేశాయి.