Viral news: దొంగ...పోలీస్‌..పరుగో పరుగు..వీడియో వైరల్‌!

అమృత్‌సర్‌: ఓ కారులో నేరస్థులు రయ్‌ మంటూ దూసుకొచ్చారు.. వారికి ఎదురుగా పోలీసులు మరో వాహనంలో సర్‌ర్‌ మంటూ వచ్చారు. రెండు వాహనాలు దాదాపు మీటరు దూరంలో ఆగాయి. అంతే.. నేరస్తులు కారు డోరు తీసి పరుగు తీశారు. వారిని పట్టుకునేందుకు పోలీసులు కూడా కాళ్లకి పని చెప్పారు. అచ్చం సినిమా సన్నివేశాన్ని తలపించే ఈ ఘటన పంజాబ్‌లోని అమృత్‌సర్‌లో చోటు చేసుకుంది. ఈ తతంగమంతా అక్కడ ఏర్పాటు చేసిన సీసీకెమెరాల్లో నిక్షిప్తమైంది. దీనికి సంబంధించిన వీడియో సామాజిక మాధ్యమాల్లో పోస్టు చేయడంతో వైరల్‌గా మారింది. చివరికి ఇద్దరు దుండగులను పట్టుకున్నట్లు అమృత్‌సర్‌ పోలిస్‌కమిషనర్‌ జస్‌కరణ్‌ సింగ్‌ తెలిపారు. వీరిద్దరూ దాదాపు ఐదారు కేసుల్లో నిందితులుగా ఉన్నట్లు  చెప్పారు. వారి నుంచి ఐదు ఆయుధాలతోపాటు గన్‌లో ఉపయోగించే క్యాట్రిజ్‌ను స్వాధీనం చేసుకున్నామని తెలిపారు.