Priyanka Gandhi: రాహుల్‌ గాంధీ గురించి ప్రియాంక స్వీట్‌ పోస్ట్‌

దిల్లీ: అంతర్జాతీయ తోబుట్టువుల దినోత్సవం (International Siblings Day) సందర్భంగా కాంగ్రెస్‌ ప్రధాన కార్యదర్శి ప్రియాంక గాంధీ (Priyanka Gandhi) తన సోదరుడు రాహుల్‌ గాంధీతో కలిసి దిగిన ఫొటోను ఇన్‌స్టాగ్రామ్‌లో పంచుకున్నారు. అందులో రాహుల్‌ తన సోదరి భుజంపై చేయి వేసి మంచులో నడుస్తున్నట్లుంది. ‘ఎంతో మంది బురదజల్లే ప్రయత్నం చేస్తున్నా.. మంచితనం కోసం నిలబడే ధైర్యం ఉన్న వారు, ప్రత్యర్థులు అణగదొక్కాలని చూసినా.. అన్యాయాన్ని ఎదుర్కొనేవారు, ఎల్లప్పుడూ నిజాన్ని మాట్లాడే వ్యక్తి నా సోదరుడు’ అని ప్రియాంక గాంధీ తన ఇన్‌స్టాగ్రామ్‌ పోస్ట్‌లో రాసుకొచ్చారు. నేను మిమ్మల్ని చూసి గర్వపడుతున్నాను అంటూ పోస్ట్‌ చివరిలో హార్ట్‌ని కూడా జత చేశారు. తోబుట్టువుల దినోత్సవం మొట్టమొదట 1995లో ప్రారంభమైంది. ఆ తర్వాత ప్రపంచవ్యాప్తంగా విస్తరించింది. 1998 నుంచి అమెరికాలోని 39 రాష్ట్రాల గవర్నర్లు అధికారికంగా తోబుట్టువుల దినోత్సవాన్ని ఒక సంప్రదాయంగా గుర్తించారు. నేషనల్ సిబ్లింగ్స్ డే  పేరిట ఇవాళ అక్కడ సెలవుదినంగా ప్రకటించారు.