Grenade Attack: ఉగ్రవాదుల గ్రెనేడ్‌ దాడి.. అమరుడైన పోలీసు

శ్రీనగర్‌: ఇటీవల జమ్మూ- కశ్మీర్‌లోని అనంతనాగ్‌ జిల్లాలో కాల్పులు జరిపి ఓ హెడ్‌ కానిస్టేబుల్‌ను బలిగొన్న ఉగ్రవాదులు.. తాజాగా బందిపొరాలో గ్రెనేడ్‌ దాడికి పాల్పడి మరొక పోలీసు ప్రాణాలు తీశారు. శుక్రవారం సాయంత్రం ఇక్కడి నిషాత్ పార్క్ సమీపంలో స్థానిక పోలీసులు, బీఎస్‌ఎఫ్‌ సంయుక్త బృందంపై ఉగ్రవాదులు గ్రెనేడ్ విసిరారు. ఈ దాడిలో తొలుత అయిదుగురికి గాయాలు కాగా.. వారిని వెంటనే సమీప ఆసుపత్రికి తరలించారు. అక్కడ చికిత్స పొందుతూ పోలీసు సిబ్బందిలోని జుబైర్ అహ్మద్ మృతి చెందినట్లు అధికారులు ఒక ప్రకటనలో తెలిపారు. మిగతా సిబ్బంది పరిస్థితి నిలకడగా ఉందని వెల్లడించారు. ఈ ఘటనపై కేసు నమోదు చేసినట్లు చెప్పారు. మరోవైపు భద్రతాబలగాలు ఘటనా స్థలాన్ని చుట్టుముట్టి, సెర్చ్‌ ఆపరేషన్‌ చేపడుతున్నాయి.

జనవరి 29న.. కుల్గాం పోలీస్ స్టేషన్‌లో హెడ్ కానిస్టేబుల్‌గా విధులు నిర్వహిస్తున్న గనీపై ముష్కరులు కాల్పులు జరిపిన విషయం తెలిసిందే. ఈ ఘటనలో తీవ్ర గాయాలు కావడంతో ఆయన ప్రాణాలు కోల్పోయారు. అయితే, గనీ హత్య కేసులో ప్రమేయం ఉన్నట్లు భావిస్తున్న ఓ ఉగ్రవాదిని పోలీసులు గతవారం ఎన్‌కౌంటర్‌ చేశారు. కొన్నాళ్లుగా భద్రతాబలగాలు కశ్మీర్‌ లోయలో ఉగ్రవాదుల ఏరివేత కార్యక్రమాలను ముమ్మరం చేశాయి. ఈ ఏడాది జనవరిలోనే దాదాపు పదికి పైగా ఎన్‌కౌంటర్లు నిర్వహించాయి.