Terrorist Attack: మార్కెట్‌లో గ్రెనేడ్‌ దాడి.. ఒకరి మృతి, 24 మందికి గాయాలు

శ్రీనగర్‌: ఉగ్రదాడితో జమ్ముకశ్మీర్‌ మరోసారి ఉలిక్కిపడింది. శ్రీనగర్‌లో రద్దీగా ఉండే ఆదివారం మార్కెట్‌పై గ్రెనేడ్‌ దాడి జరిగింది. ఈ ఘటనలో ఓ పౌరుడు మృతిచెందగా.. 24 మంది గాయపడ్డారు. గాయపడిన వారిలో పోలీసులు కూడా ఉన్నారు. హరిసింగ్‌ హైస్ట్రీట్‌ వద్ద కాపలా కాస్తున్న పోలీసులే లక్ష్యంగా ఉగ్రవాదులు ఈ దాడికి పాల్పడినట్లు అధికారులు వెల్లడించారు. కాగా దాడిలో అధికంగా సామాన్య పౌరులే బాధితులుగా మారినట్లు తెలిపారు. క్షతగాత్రులను మహారాజా హరిసింగ్‌ ఆసుపత్రికి తరలించామని, ఓ పోలీసు, మరో బాలిక పరిస్థితి విషయంగా ఉన్నట్లు పేర్కొన్నారు. కట్టడిముట్టడి నిర్వహించి నిందితుల కోసం గాలింపు చర్యలు చేపట్టినట్లు వెల్లడించారు.

ఈ ఘటనపై జమ్ముకశ్మీర్‌ మాజీ ముఖ్యమంత్రి ఒమర్‌ అబ్దుల్లా దిగ్భాంతి వ్యక్తం చేశారు. ‘  దుర్మార్గమైన దాడి అంటూ ఖండించారు. ‘ఈ శోచనీయమైన దాడిని తీవ్రంగా ఖండిస్తున్నా. మరణించిన వ్యక్తి ఆత్మకు శాంతి చేకూరాలని, గాయపడినవారు త్వరగా కోలుకోవాలని కోరుకుంటున్నా’ అంటూ ట్వీట్‌ చేశారు.