Southern Railway: రైళ్లలో ప్రయాణించాలంటే.. టీకా సర్టిఫికెట్ తప్పనిసరి!

చెన్నై: తమిళనాడులో కరోనా మళ్లీ విజృంభిస్తున్న నేపథ్యంలో దక్షిణ రైల్వే కీలక ఆదేశాలు జారీ చేసింది. కరోనా టీకా రెండు డోసులు తీసుకున్నవారికి మాత్రమే చెన్నై లోకల్‌ రైళ్లలో ప్రయాణించేందుకు అనుమతిస్తామని వెల్లడించింది. కౌంటర్​ వద్ద కొవిడ్ వ్యాక్సినేషన్​ సర్టిఫికెట్ చూపించినవారికే టికెట్​ అందిస్తామని అధికారులు ఈ మేరకు స్పష్టం చేశారు. జనవరి 10 నుంచి 31వ తేదీ వరకు ఈ నిబంధనలు అమల్లో ఉంటాయని తెలిపారు. ఒమిక్రాన్‌ కేసులు వెలుగుచూస్తున్న నేపథ్యంలో ఈ నిర్ణయం తీసుకున్నట్లు తెలిపారు.

అంతేకాక దక్షిణ జోన్​లోని రైల్వేస్టేషన్​ ప్రాంతాల్లో మాస్కు లేకుండా కనిపిస్తే రూ. 500 జరిమానా విధిస్తామని రైల్వే జోన్ హెచ్చరికలు జారీ చేసింది. ప్రయాణికులు కొవిడ్ నిబంధనలను తప్పక పాటించాలని సూచించింది. కరోనా వ్యాప్తి దృష్ట్యా దక్షిణ రైల్వే​.. జనవరి 6 నుంచే పలు రకాల ఆంక్షలను విధిస్తూ వస్తోంది. రైళ్లను 50 శాతం సీటింగ్ సామర్థ్యంతోనే నడుపుతోంది.

గడిచిన 24 గంటల్లో తమిళనాడులో కొత్తగా 8,981 మందికి పాజిటివ్‌గా తేలింది. మహమ్మారితో మరో 8 మంది మృతిచెందారు. కాగా మొత్తం కొవిడ్ కేసుల సంఖ్య 27,76,413కు చేరింది. రాష్ట్రంలో మొత్తం మరణాల సంఖ్య 36,833కు చేరింది. తమిళనాడులో ఇప్పటివరకు 121 మందికి ఒమిక్రాన్‌గా నిర్ధరణ అయింది. ఇందులో 117 మంది కోలుకున్నారు.