Multi Crore Scam: నల్ల డైరీ చెప్పిన గోల్‌ ‘మాల్‌’ కథ.. రూ.కోట్లలోనే కస్టమర్లకు సున్నం!

రూ.2500తో డేటా కొనుగోలు చేసి.. రూ. కోట్ల మేర మోసాలకు పాల్పడ్డారు ఇద్దరు నిందితులు. నోయిడాలో జరిగిన ఈ వ్యవహారం తాజాగా వెలుగులోకి వచ్చింది.

Updated : 07 Jul 2024 17:48 IST

ఇంటర్నెట్‌డెస్క్‌: మందులు కొనుగోలు చేసేందుకో, డిపార్ట్‌మెంటల్‌ స్టోర్‌కో (Departmental Store), మెగామాల్స్‌కో (Mega Malls) వెళ్లినప్పుడు బిల్లింగ్‌ సమయంలో ఫోన్‌ నెంబర్‌ అడుగుతుంటారు. తప్పనిసరి కానప్పటికీ, రివార్డు పాయింట్లు (Reward Points) యాడ్‌ అవుతాయని కొందరు, నెంబర్‌ ఇస్తే ఏమవుతుందిలే.. అని ఇంకొందరు ఇచ్చేస్తుంటారు. కానీ, ఆ డేటాతోనే కొందరు మోసాలకు పాల్పడుతున్నారు. నేరగాళ్లు (Cyber Crime) ఆ డేటాను కొనుగోలు చేసి.. అమాయకులను బోల్తా కొట్టిస్తున్నారు. నోయిడాలో తాజాగా వెలుగులోకి వచ్చిన ఘటనే అందుకు నిదర్శనం. ఓ మెగామాల్‌ నుంచి రూ. 2500లకు కస్టమర్ల డేటాను కొనుగోలు చేసి... ఇద్దరు వ్యక్తులు కోట్ల మేర సంపాదించారు. గత ఏడాది కాలంగా కొనసాగుతున్న ఈ ఘరానా మోసాన్ని తాజాగా పోలీసులు ఛేదించారు.

ఆశీష్‌, జితేంద్ర అనే ఇద్దరు వ్యక్తులు 2019లో ఎస్‌బీఐ లైఫ్‌ ఇన్సూరెన్స్‌ సంస్థలో పని చేసేవారు. కొన్నాళ్లకు వివిధ కారణాలతో ఉద్యోగం మానేశారు. అక్రమంగా డబ్బు సంపాదించాలనే ఉద్దేశంతో..  నోయిడా సెక్టార్‌ 51లో ఎలాంటి అనుమతులు తీసుకోకుండా ఓ కాల్‌ సెంటర్‌ను ఏర్పాటు చేశారు. 9 మంది మహిళలను రిక్రూట్‌ చేసుకున్నారు. దిల్లీలోని ఓ మెగామార్ట్‌ సిబ్బందికి రూ.2500 ఇచ్చి.. 10,000 మంది కస్టమర్ల ఫోన్‌నెంబర్లు సేకరించి ఆ మహిళలకు ఇచ్చారు. తక్కువ ధరకే ఎక్కువ ప్రయోజనాలు కలిగేలా వివిధ ఇన్సూరెన్స్‌ పాలసీలు ఇస్తామని చెబుతూ.. అవతలి వాళ్లు పాలసీ తీసుకునేలా ఒప్పించడమే వారి పని. ‘ఎంత ఎక్కువ మందిని ఒప్పిస్తే.. అంత ఎక్కువ జీతం’ ఇస్తామని వారికి ఆశ కల్పించారు. ప్రధానంగా దిల్లీ, నేషనల్‌ క్యాపిటల్‌ రీజియన్‌ (ఎన్‌సీఆర్‌) బయట ఉన్నవారిపైనే దృష్టి పెట్టాలని వారికి సూచించారు.

తమ ఉనికిని ఎవరూ గుర్తు పట్టకుండా ఉండేందుకు తప్పుడు ఆధార్‌ వివరాలతో 10 సిమ్‌ కార్డులు తీసుకున్నారు. వాటి ద్వారా మాత్రమే కాల్‌సెంటర్‌ ఉద్యోగులు ఫోన్లు చేసేవారు. ఒకవేళ మోసపోయామని ఎవరైనా గుర్తించి పోలీసులకు ఫిర్యాదు చేసినా.. అడ్రస్‌ ఆధారంగా వారిని గుర్తు పట్టకుండా ఉండేందుకే ఈ పన్నాగం పన్నారు. అంతే కాకుండా బాధితులు పంపిన డబ్బుల విషయంలోనూ ఆశీష్‌, జితేంద్ర పక్కా ప్లాన్‌తో వ్యవహరించారు. కర్ణాటకకు చెందిన అర్వింద్‌ అనే వ్యక్తి బ్యాంకు ఖాతాను నెలకు రూ.10,000 చొప్పున అద్దెకు తీసుకున్నారు. పాలసీలకు ఆకర్షితులైన వారిని ఆ అకౌంట్‌లో డబ్బులు జమ చేయాలని కోరేవారు. డెబిట్ కార్డు సాయంతో అందులోని డబ్బులను విత్‌డ్రా చేసుకునేవాళ్లు. 

చాలా రోజులుగా ఈ తంతు కొనసాగడంతో.. అనుమానం వచ్చిన స్థానికులు పోలీసులకు ఫిర్యాదు చేశారు.ఈ మేరకు కాల్‌ సెంటర్‌లో పోలీసులు సోదాలు నిర్వహించారు. అనుమతి పత్రాలేవీ లేకపోవడంతో ఆశీష్‌, జితేంద్రతోపాటు అక్కడ పని చేస్తున్న 9 మంది మహిళలను కస్టడీలోకి తీసుకున్నారు. సోదాలు నిర్వహిస్తున్న సమయంలో కార్యాలయంలో ఓ నలుపు రంగు డైరీ దొరికింది. గత ఏడాది కాలంలో జరిగిన ప్రతి లావాదేవీ వివరాలు అందులో ఉన్నాయి. వాటన్నింటినీ పరిశీలించిన పోలీసులు ఆశ్చర్యపోయారు. కోట్ల రూపాయల్లోనే మోసం జరిగిందని అంచనాకు వచ్చారు. నిందితులందర్నీ అరెస్టు చేసి కోర్టులో ప్రవేశపెట్టి.. న్యాయస్థానం ఆదేశం మేరకు కస్టడీలోకి తీసుకున్నారు.

Tags :

గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సుతో పంపబడతాయి. పాఠకులు తగిన జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.

మరిన్ని