Netaji statue: ఇండియా గేట్‌ వద్ద నేతాజీ విగ్రహాన్ని ఆవిష్కరించిన ప్రధాని

దిల్లీ: నేతాజీ సుభాష్‌ చంద్రబోస్‌ 125వ జయంతిని పురస్కరించుకొని రాజధాని దిల్లీలోని ఇండియా గేట్‌ వద్ద నేతాజీ హోలోగ్రామ్‌ను ప్రధాని మోదీ ఆవిష్కరించారు. ప్రధాని సహా కేంద్ర హోం మంత్రి అమిత్‌ షా, కేంద్రమంత్రి హర్దీప్‌సింగ్‌ పూరి నేతాజీకి నివాళులు అర్పించారు. ఈ సందర్భంగా మోదీ మాట్లాడుతూ.. నేతాజీ జయంతిని పురస్కరించుకొని ఏడాదిగా పరాక్రమ ఉత్సవాలు నిర్వహిస్తున్నట్లు పేర్కొన్నారు. దేశ స్వాంతంత్ర్య పోరాటంలో ప్రాణాలొదిలిన అనేక మంది సైనికులకు ఈ విగ్రహం ప్రతిరూపంగా నిలుస్తుందని పేర్కొన్నారు.

బ్రిటిషర్ల ముందు తల వంచని పరాక్రమ నేత నేతాజీ అని మోదీ కొనియాడారు. ప్రజాస్వామ్య విలువలు, భావితరాలకు ఈ విగ్రహం స్ఫూర్తి నింపుతుందన్నారు. ‘నేను చేయగలను. చేస్తాను’ అనే నేతాజీ నినాదాలతో యువత ముందుకు సాగాలని ఈ సందర్భంగా ప్రధాని పిలుపునిచ్చారు. ‘ఇది కేవలం విగ్రహం మాత్రమే కాదు. దేశ స్వాతంత్ర్యం కోసం సర్వస్వం ధారపోసిన నేతాజీకి ఘనమైన నివాళి’ అని మోదీ వ్యాఖ్యానించారు. త్వరలోనే గ్రానైట్‌తో బోస్‌ మరో విగ్రహాన్ని ఏర్పాటు చేస్తామని ప్రకటించారు.