modi: ప్రధాని మోదీ భద్రతకు ఎస్‌-650 గార్డ్‌..!

ఇంటర్నెట్‌డెస్క్‌: ప్రధాని నరేంద్ర మోదీ భద్రతకు స్పెషల్‌ ప్రొటెక్షన్‌ గ్రూప్‌ సరికొత్త కారును తీసుకొంది. ‘మెర్సిడీస్‌-మైబహ్‌ ఎస్‌-650 గార్డ్‌’ని కొనుగోలు చేసింది. ఇటీవల రష్యా అధ్యక్షుడు వ్లాదిమిర్‌ పుతిన్‌ పర్యటన సందర్భంగా ప్రధాని ఈ కారులోనే హైదరాబాద్‌ హౌస్‌కు చేరుకొన్నారు. ఈ కారు ఖరీదు రూ.12 కోట్లు పైమాటే.. ఇది విఆర్‌-10 స్థాయి భద్రతను కల్పిస్తుంది. సాయుధ దాడుల నుంచి ఈ కారు బలమైన రక్షణ ఇస్తుంది.

ఇటీవల స్పెషల్‌ ప్రొటెక్షన్‌ గ్రూప్‌ ప్రధాని భద్రతకు కొన్ని అవసరాలను గుర్తించింది. ఈ నేపథ్యంలో ఆయన వాహనాన్ని మార్చాలని నిర్ణయించింది. ఈ నేపథ్యంలో రెండు ఎస్‌-650 గార్డ్‌ కార్లను కొనుగోలు చేసింది. ఒక దానిలో ప్రధాని ఉండగా.. మరోకారును డికాయ్‌(ప్రధాని ఉన్నట్లు తలపించే వాహనం)గా వినియోగిస్తారు.

గుజరాత్‌ ముఖ్యమంత్రిగా ఉన్న సమయంలో మోదీ మహీంద్రా స్కార్పియో వినియోగించేవారు. ఆ తర్వాత ప్రధాని అయ్యాక బీఎండబ్ల్యూ 7 సిరీస్‌ హైసెక్యూరిటీ ఎడిషన్‌‌, రేంజిరోవర్‌ వోగ్‌, టయోటా ల్యాండ్‌ క్రూయిజర్‌లను వినియోగించారు.

ఈ కారులో ప్రత్యేక ఫీచర్లు ఇవే..

* విలాసవంతమైన ఎస్‌-650 గార్డ్‌  కారు వినియోగదారులకు  అత్యున్నత శ్రేణి రక్షణ కల్పించేలా మెర్సిడీస్‌ జాగ్రత్తలు తీసుకొంది. కారు బాడీ, విండోస్‌ ఏకే-47 తూటాలను తట్టుకొని నిలబడతాయి.

* కారుకు ఈవీఆర్‌ (ఎక్సప్లోజీవ్‌ రెసిస్టెటంట్‌ వెహికల్‌ )2010 రేటింగ్‌ లభించింది. ఇది దాదాపు రెండు మీటర్ల దూరంలోపు జరిగే 15 కిలోల టీఎన్‌టీ పేలుడు శక్తిని నుంచి ప్రయాణికులకు కాపాడుతుంది. కారు విండోస్‌కు పాలీకార్బొనేట్‌ ప్రొటెక్షన్‌ ఇస్తుంది. కారు కింద జరిగే పేలుడు నుంచి తట్టుకొనేలా రక్షణ ఏర్పాట్లు ఉన్నాయి.

* ఇక విషవాయువులతో దాడి జరిగినా.. లోపల ఉన్న వీవీఐపీని రక్షించేలా కారులోపలే ప్రత్యేకమైన ఆక్సిజన్‌ సరఫరా విభాగం ఉంది.

*  ఈ వాహనంలో అత్యంత శక్తివంతమైన 6.0లీటర్‌ ట్విన్‌ టర్బో ఇంజిన్‌ అమర్చారు. ఇది 516 బీహెచ్‌పీ శక్తిని విడుదల చేస్తుంది. 900ఎన్‌ఎం పీక్‌ టార్క్‌ను అందుకొంటుంది. 

* భారీ ఇంజిన్‌ ఉన్నా.. కారు వేగాన్ని గంటకు160 కిలోమీటర్లకే పరిమితి చేశారు. 

* ఈ కారుకు ప్రత్యేకమైన ఫ్లాట్‌ టైర్లను వినియోగించారు. పంక్చర్లు పడినా.. దెబ్బతిన్నా ఇబ్బంది లేకుండా ప్రయాణించేందుకు అవకాశం ఉంది.