Gujarat: అక్కడ 40ఏళ్లుగా ఎన్నికల ప్రచారం నిషేధం.. ఓటెయ్యకపోతే జరిమానా..!

గుజరాత్‌లోని రాజ్‌కోట్‌ జిల్లాకు సమీపంలో ఉన్న రాజ్‌ సమాధియాలా గ్రామంలోకి రాజకీయ పార్టీల నేతలు వెళ్లేందుకు ఆ ఊరి పెద్దలు అనుమతించరట. అక్కడ ఎన్నికల ప్రచారంపై నిషేధం ఉంటుంది.

Published : 23 Nov 2022 16:00 IST

రాజ్‌కోట్‌: గుజరాత్‌ (Gujarat) అసెంబ్లీ ఎన్నికల (Assembly elections) పోలింగ్‌ దగ్గరపడుతుండటంతో రాష్ట్రంలో ఏ మూల చూసినా ప్రచార జోరే కన్పిస్తోంది. కానీ, ఆ గ్రామంలో మాత్రం ఆ సందడే లేదు. అక్కడ రాజకీయ పార్టీలు ర్యాలీలు, సభలు లేవు.. ఇంటింటికి వెళ్లి ఓట్లు అభ్యర్థించడాల్లేమీ ఉండవు. అయితే ఇదేదో రవాణా సౌకర్యం అంతగా లేని మారుమూల ప్రాంతం అనుకుంటే పొరబాటే. రాజ్‌కోట్‌కు కేవలం 20 కిలోమీటర్ల దూరంలోనే ఉన్న రాజ్‌ సమాధియాలా (Raj Samadhiyala) గ్రామంలోని పరిస్థితి ఇది. ఎందుకంటే.. ఎన్నికల ప్రచారంపై ఆ గ్రామం నిషేధం విధించుకుంది మరి..!

రాజ్‌కోట్‌ జిల్లాలోని రాజ్‌ సమాధియాలా గ్రామంలోకి రాజకీయ పార్టీల నేతలు వెళ్లేందుకు ఆ ఊరి పెద్దలు అనుమతించరట. పార్టీ నాయకులు తమ ఊర్లో ఎన్నికల ప్రచారం నిర్వహించకుండా గ్రామ అభివృద్ధి కమిటీ (వీడీసీ) నిషేధం విధించింది. ఇది ఈ నాటిది కాదు. గత నాలుగు దశాబ్దాలుగా ఇదే పద్ధతిని అనుసరిస్తున్నారు. ఎన్నికల అభ్యర్థులు తమ గ్రామంలో ప్రచారం చేస్తే తమ ప్రాంతానికి హాని జరుగుతుందని ఇక్కడి వారి విశ్వాసం. అందుకే రాజకీయ పార్టీలను ఎన్నికల ప్రచారానికి అనుమతించరట.

దీనిపై గ్రామ సర్పంచి మాట్లాడుతూ.. ‘‘మా గ్రామంలో ఎన్నికల ప్రచారం చేపట్టకుండా 1983 నుంచి నిషేధం అమల్లో ఉంది. మా విశ్వాసాల గురించి రాజకీయ పార్టీలకూ తెలుసు. అందుకే ఇక్కడ ఏ రాజకీయ పార్టీ ప్రచారం చేపట్టదు’’ అని తెలిపారు. అభ్యర్థుల ప్రచారం మాత్రమే కాదు.. ఇళ్లు, వీధుల్లో రాజకీయ పార్టీల బ్యానర్లు అంటించడం, కరపత్రాలు పంచడం కూడా ఇక్కడ నిషేధమే.  అయితే ఎన్నికల్లో ఓటు హక్కు వినియోగించుకోవడంలో ఈ గ్రామం ముందుంటుంది. విలేజ్‌ డెవలప్‌మెంట్ కమిటీ రూపొందించిన నిబంధనలను గ్రామస్థులు తప్పనిసరిగా పాటించాల్సిందే. అందులో భాగంగానే.. ఓటు వేయకపోతే రూ.51 జరిమానా విధిస్తారు. దీంతో ఎప్పుడు ఎన్నికలు జరిగినా తమ గ్రామంలో దాదాపు 100శాతం ఓటింగ్‌ నమోదవుతుందని సర్పంచి తెలిపారు. ఒకవేళ, తప్పనిసరి పరిస్థితులు ఓటు వేయకలేకపోతే.. వారు ముందస్తు అనుమతి తీసుకోవాల్సి ఉంటుందని చెప్పారు.

1700 మంది జనాభా ఉన్న ఈ గ్రామంలో 995 మంది ఓటర్లు ఉన్నారు. ప్రచారం లేకపోవడంతో తమకు నచ్చిన అభ్యర్థికి ఓటేస్తామని గ్రామస్థులు చెబుతున్నారు. ఈ గ్రామంలో వైఫై, సీసీటీవీ కెమెరాల వంటి అధునాతన సౌకర్యాలు ఉన్నాయి. కేవలం ఓటెయ్యకపోతే మాత్రమే కాదండోయ్.. చెత్త బయట విసిరేసినా ఇక్కడి ప్రజలు జరిమానాలు చెల్లించాల్సిందే..! ఇంకో విషయమేంటంటే.. ఈ గ్రామాన్ని చూసి చుట్టుపక్కల ఊర్లు కూడా ఈ మధ్య ఇలాంటి నిషేధాన్ని అమల్లోకి తీసుకొచ్చాయి.

Read latest India News and Telugu News

Follow us on Facebook, Twitter, Instagram & Google News.

Tags :

గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సుతో పంపబడతాయి. పాఠకులు తగిన జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.


మరిన్ని

ap-districts
ts-districts

ఎక్కువ మంది చదివినవి (Most Read)

మరిన్ని