Pramod Sawant: గోవా ముఖ్యమంత్రిగా ప్రమోద్‌ సావంత్‌ ప్రమాణ స్వీకారం

వరుసగా రెండోసారి పదవి చేపట్టిన నేత

పనాజీ: గోవా ముఖ్యమంత్రిగా ప్రమోద్‌ సావంత్(48) సోమవారం ప్రమాణ స్వీకారం చేశారు. వరుసగా రెండోసారి ఆయన ఈ పదవిని చేపట్టారు. అక్కడి డాక్టర్ శ్యామ్ ప్రసాద్ ముఖర్జీ ఇండోర్ స్టేడియంలో ఈ కార్యక్రమం జరిగింది. ఈ వేడుకకు ప్రధాని నరేంద్రమోదీ, రక్షణ శాఖ మంత్రి రాజనాథ్‌ సింగ్, ఇతర ప్రముఖులు హాజరై.. కొత్త ముఖ్యమంత్రికి శుభాకాంక్షలు తెలియజేశారు.

ఇటీవల జరిగిన గోవా అసెంబ్లీ ఎన్నికల్లో భాజపా విజయం సాధించిన సంగతి తెలిసిందే. 40 స్థానాలున్న అసెంబ్లీకి కమలం పార్టీ నుంచి 20 మంది సభ్యులు ఎన్నికయ్యారు. దాంతో మెజార్టీకి ఒక్క సీటు దూరమైంది. అయితే ప్రభుత్వ ఏర్పాటులో ముగ్గురు స్వతంత్ర ఎమ్మెల్యేలు, మహారాష్ట్ర వాది గోమంతక్‌ పార్టీ(ఎంజీపీ)కి చెందిన ఇద్దరు ఎమ్మెల్యేలు భాజపాకు మద్దతు పలికారు. ఈ క్రమంలో అసెంబ్లీలో సావంత్‌ తన మెజార్టీని నిరూపించుకోవాల్సి ఉంటుంది. అందుకోసం రెండురోజుల పాటు అసెంబ్లీ సెషన్‌ కోసం గవర్నర్ సీఎస్ శ్రీధరన్‌ పిళ్లై ఆదేశాలిచ్చారు.

2019లో అప్పటి ముఖ్యమంత్రి మనోహర్‌ పారికర్ మరణించడంతో సావంత్ ముఖ్యమంత్రిగా ప్రమాణ స్వీకారం చేశారు. ఇటీవల ఎన్నికల విజయంతో రెండోసారి ఆ పదవిని చేపట్టారు. పారికర్ వలే ఈయన కూడా రాజభవన్ ప్రాంగణంలో కాకుండా బయట ప్రమాణ స్వీకారం చేశారు.