Madhya Pradesh: ప్రైమరీ స్కూల్‌ టీచర్‌.. 20 కాలేజీలకు యజమాని..!

(ప్రతీకాత్మక చిత్రం)

గ్వాలియర్‌: ఆయనో ప్రభుత్వ ప్రాథమిక పాఠశాలలో ఉపాధ్యాయుడు.. నెలకు వచ్చే జీతం వేలల్లోనే ఉంది. కానీ ఆయన ఆస్తులు మాత్రం సంపాదన కంటే వెయ్యి రెట్లు ఎక్కువ. అంతేనా.. ఏకంగా 20 కాలేజీలకు యజమాని కూడా.. అధికారులు నివ్వెరపోయిన ఈ ఘటన మధ్యప్రదేశ్‌లో వెలుగులోకి వచ్చింది. వివరాల్లోకి వెళితే.. 

మధ్యప్రదేశ్‌లోని ఘాటిగావ్‌ ప్రాంతానికి చెందిన ప్రశాంత్‌ పార్మర్‌.. స్థానిక ప్రభుత్వ ప్రాథమిక పాఠశాలలో ఉపాధ్యాయుడిగా పనిచేస్తున్నారు. అయితే ఆయన వేలకొద్దీ అక్రమాస్తులు సంపాదిస్తున్నట్లు పోలీసులకు రహస్య సమాచారం అందింది. దీంతో ఎకనమిక్‌ అఫెన్సెస్‌ వింగ్‌(ఈఓడ్ల్యూ) అధికారులు ఇటీవల ప్రశాంత్‌ ఇల్లు, ఇతర ప్రదేశాల్లో సోదాలు చేపట్టగా.. ఆయన ఆస్తులు చూసి  అవాక్కయ్యారు.

ప్రశాంత్‌కు గ్వాలియర్‌-చంబల్‌ ప్రాంతంలో బీఈడీ, డీఈడీ కోర్సులు బోధించే 20 కళాశాలలు ఉన్నట్లు సోదాల్లో బయటపడింది. దీంతో పాటు నాలుగు ఆఫీసులు, 3 నర్సింగ్‌ కాలేజీలు కూడా ఉన్నట్లు తేలింది. ఈ ఆస్తుల విలువ ఆయన సంపాదన కంటే 1000 రెట్ల కంటే ఎక్కువేనట. ప్రశాంత్‌ 2006లోనే టీచర్‌గా విధుల్లో చేరారు. అప్పుడు ఆయన నెల జీతం రూ.3500 మాత్రమే. ఆయన ఇంట్లో దొరికిన కాలేజీ పత్రాలతో పాటు ఇతర ఆస్తులు, బ్యాంక్‌ ఖాతాలు, లాకర్లను పోలీసులు గుర్తించారు. వీటిపై దర్యాప్తు చేస్తున్నట్లు తెలిపారు.