Punjab: పంజాబ్‌ కేబినేట్‌ విస్తరణ.. కొత్తగా మరో ఐదుగురికి చోటు!

చండీగఢ్: పంజాబ్ ముఖ్యమంత్రి భగవంత్ మాన్ తన మంత్రి వర్గాన్ని విస్తరించనున్నారు. జులై 4న ఐదుగురు ఎమ్మెల్యేలను తన కేబినెట్‌లో చేర్చుకోనున్నట్లు పార్టీ వర్గాలు ఆదివారం తెలిపాయి. అక్కడి రాజ్‌భవన్‌లో రేపు(సోమవారం) సాయంత్రం 5గంటలకు కొత్త మంత్రుల ప్రమాణస్వీకార కార్యక్రమం ఉంటుందని తెలిసింది. కొత్త వారి చేరికతో కేబినెట్‌లోని సభ్యుల సంఖ్య 15(ముఖ్యమంత్రితో సహా)కు చేరనుంది.

భగవంత్‌ మాన్‌ కేబినెట్‌లో కొత్తగా చేర్చుకునే వారిలో అమన్‌ అరోరా(సునం నియోజకవర్గం), సర్వ్‌జిత్‌ కౌర్‌ మనుకే(జగ్రావ్‌), బల్జిందర్‌ కౌర్‌(తల్వాండీ సబో), బుద్‌ రామ్‌(బుద్‌లాడా), సింగ్‌ నిజ్జర్‌(అమృత్‌ సర్‌ సౌత్‌), అన్మోల్‌గగన్‌ మాన్‌(ఖరార్‌) ఉండనున్నట్లు సమాచారం. అయితే, దీనిపై అధికారికంగా ఎటువంటి ప్రకటన వెలువడలేదు. కాగా.. 2022 పంజాబ్‌ అసెంబ్లీ ఎన్నికల్లో ఆమ్‌ ఆద్మీ పార్టీ 92 స్థానాలను గెలుచుకొని భగవంత్‌ మాన్ సారథ్యంలో అధికారాన్ని చేపట్టిన విషయం తెలిసిందే. అయితే, మూడు నెలల క్రితం ఏర్పడిన ప్రభుత్వంలో ముఖ్యమంత్రితో కలుపుకొని 10 మంది ఎమ్మెల్యేలతో మంత్రి వర్గాన్ని ఏర్పాటు చేశారు. తాజాగా కేబినేట్‌ను విస్తరించి మరికొంత మందికి మంత్రి పదవులు కట్టబెట్టాలని మాన్‌ ప్రభుత్వం నిర్ణయించినట్లు పార్టీ వర్గాలు తెలిపాయి.