Samatha Murthy: సమతా మూర్తి విగ్రహంపై రాహుల్‌ ఆసక్తికర ట్వీట్‌

ఇంటర్నెట్‌డెస్క్‌: హైదరాబాద్‌లోని సమతా మూర్తి శ్రీరామానుజాచార్యుల విగ్రహం స్టాచ్యూ ఆఫ్‌ ఈక్వాలిటీపై కాంగ్రెస్‌ అగ్రనేత రాహుల్‌ గాంధీ స్పందించారు. ఈ విగ్రహాన్ని చైనాలో తయారుచేయడాన్ని ప్రస్తావిస్తూ కేంద్ర ప్రభుత్వంపై మరోసారి విమర్శలు ఎక్కుపెట్టారు. ‘‘స్టాచ్యూ ఆఫ్‌ ఈక్వాలిటీని చైనాలో తయారుచేశారు. ‘నవ భారత్‌’ అంటే చైనా-నిర్భరేనా?’’ అంటూ ప్రధాని మోదీని పరోక్షంగా విమర్శించారు. 

హైదరాబాద్‌ శివారు ముచ్చింతల్‌లోని శ్రీరామనగరంలో ప్రతిష్ఠించిన 216 అడుగుల సమతామూర్తిని ప్రధానమంత్రి నరేంద్రమోదీ గత శనివారం ఆవిష్కరించి జాతికి అంకితం చేసిన విషయం తెలిసిందే. ఈ భారీ విగ్రహాన్ని చైనాలోని ఏరోసన్‌ కార్పొరేషన్‌ సంస్థ తయారుచేసింది. ఇందుకోసం 2015లోనే ఆ కంపెనీ కాంట్రాక్ట్‌ తీసుకుంది. విగ్రహం ప్రధాన వర్క్‌ అంతా చైనాలోనే పూర్తిచేసి 1600 విడి భాగాలుగా భారత్‌కు తీసుకొచ్చారు. ఆ తర్వాత 15 నెలల పాటు శ్రమించి ఆ భాగాలను లేయర్ల వారీగా అతికించారు. విగ్రహం పూర్తిగా పంచలోహాలతో తయారైంది. ఇందులో 83 శాతం రాగి వినియోగించగా.. వెండి, బంగారం, జింక్‌, టైటానియం లోహాలను వినియోగించి తయారు చేశారు. ప్రపంచంలోనే కూర్చుని ఉన్న విగ్రహాల్లో ఇది రెండో అతిపెద్దది కావడం విశేషం.